Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 201 Hüküm no: 133 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahide Hatun bt. Abdullah’ın vakfettiği evin oturma hakkının Nesli bt. Abdi’ye ait olduğu Dârü’s-saltanati’s-seniyye-i Kostantıniyye el-mahmiyede Medîne-i Münevvere -sallallâhu alâ-münevvirihâ- Vakfı’na bi’l-fi‘il mütevellî olan fahrü’l-eşbâh Hasan Bey b. Mehmed nâm bevvâbü’s-sultânî meclis-i şer‘-i şerîf-i nebevîye işbu hâfızatü’l-kitâb Nesli bt. Abdi nâm hatunu ihzâr ve mahzarında takrîr-i da‘vâ edip mahmiye-i mezbûre mahallâtından Mesihpaşa mahallesinde vâki‘ üç beyt-i ulvîyi ve iki beyt-i süflîyi ve sofateyni ve iki serdâbı ve bir ahırı ve kenîfi ve bi’r-i mâyı müştemil olup etrâf-ı selâsesi tarîk-i âm ile ve taraf-ı râbi‘i el-Hâc Bayram Çelebi Mescidi ile mahdûd olan menzili bundan esbak Zahide Hatun bt. Abdullah evvelâ kendi nefsine ba‘de vefâtihâ evlâdına neslen ba‘de neslin ve ba‘de’l-inkırâz Medîne-i Münevvere’ye vakfetmiştir. Hâlâ mesfûre Zahide’nin evlâdı munkatı‘ olmuşdur. Merkūme Nesli ben evlâd-ı vâkıfdanım deyu menzil-i mezbûru bi-gayrı vech-i şer‘î tasarruf eder mesfûre Nesli’ye suâl olunup menzil-i merkūmdan ihrâc olunmasın taleb ederim dedikde gıbbe’s-suâl merkūme Nesli cevâbında ben <> ve vâkıfe-i mezbûre Zahide’nin bundan akdem vefât eden [-kızı] Aynî’nin kızıyım ve benim dahi Âişe nâm kızım ve kızımın oğlu Mehmed var cümlemiz evlâd-ı vâkıfdanız ve menzil-i merkūm elli beş yıldan ziyâdedir ki evlâdiyyet üzere taht-ı tasarrufumdadır dedikde mütevellî-i mezbûr Hasan Bey hâl minvâl-i meşrûh üzere idiğine münkir olacak merkūme Nesli’den sıdk-ı makāline mutâbık beyyine taleb olundukda ahâlî-i mahalleden fahrü’l-kitâb Ahmed Efendi b. Mehmed ve Mahmud Halîfe b. Hoca el-müezzin ve Şa‘ban Bey b. Abdullah ve Mustafa Bey el-Çerkesî ve Mehmed b. Mustafa el-Çerkesî ve Durmuş Ağa b. Abdullah ez-zevvâku’s-sultânî ve Ahmed Efendi el-müderris nâm kimesneler li-ecli’ş-şehâde meclis-i şer‘-i şerîfe hâzırûn olup gıbbe’l-istişhâd fi’l-vâki‘ merkūme Nesli vâkıfe-i mezbûre Zahide’nin bundan akdem vefât eden kızı Aynî’nin kızıdır ve kendinin dahi Âişe nâm kızı vardır ve mezbûre Âişe’nin dahi oğlu Mehmed vardır bu cümlesi evlâd-ı vâkıfedendir ve menzil-i merkūm mezbûre Nesli’nin vâlidesi müteveffât-ı mezbûre Aynî’nin elli beş yıldan ziyâdedir ki taht-ı tasarruflarında[dır] hâl minvâl-i merkūm üzere idiğine cümlemiz şâhidleriz şehâdet dahi ederiz dediklerinde ba‘de’t-ta‘dîl şehâdetleri hayyiz-i kabûlde vâki‘ olup mâ-vaka‘a bi’t-taleb ketb olundu. Tahrîren fî-evâili şehri Şa‘bâni’l-mu‘azzam li-sene selâse ve ışrîn ve elf. Şühûdü’l-hâl: Fahrü’s-sâlikîn eş-Şeyh Mehmed Efendi b. Mehmed, Fazlı Efendi b. Eyüb el-müderris, Ali Efendi b. Musa el-müsta‘id, Osman Efendi b. ( ) el-imâm, Ali Çelebi b. Mustafa, Süleyman Bey b. Abdullah, Mehmed Bey b. Receb, Şa‘ban Efendi el-müderris, Mahmud Çelebi b. Ali, el-Hâc Mahmud b. Kabil, Ramazan b. Yusuf, Abdürrahim Efendi el-imâm, Hasan Çelebi b. Abdullah, İbrahim Efendi b. ( ) el-mülâzım, Sinan Efendi b. ( ) el-müderris, Mehmed Efendi b. ( ) el-müderris, Muslihiddin Efendi b. ( ) el-kādî, Hüseyin Dede b. ( ), Mehmed Efendi b. ( ) el-kādî, Mehmed Efendi b. ( ) es-sahhâf, Mustafa Çelebi b. Ahmed ve gayruhüm mine’l-hâzırîn.