Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 203 Hüküm no: 134 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Kazgancı Satı mahallesindeki evin tamiri için kiracısı Mehmed Efendi b. Süleyman’a izin verildiği Mahrûse-i Kostantıniyye’de Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Abdullah nâm bevvâbü’s-sultânî meclis-i şer‘-i şerîfde evkāf-ı mezbûreden olup mahmiye-i mezbûrede merhûm Murad Paşa Câmi‘i kurbünde Kazgancı Satı mahallesinde vâki‘ lede’l-ahâlî ma‘lûmü’l-hudûd olan menzilin yevmî iki akçe icâre-i müeccele ve icâre-i mu‘accele ile hâlâ müste’ciri olan işbu râfi‘ü’l-kitâb fahrü’l-müderrisîn Mehmed Efendi b. Süleyman muvâcehesinde takrîr-i kelâm edip menzil-i mezbûr câ be-câ harâba müşrif olup meremmâtına vakfın müsâ‘adesi olmayıp ücret-i müeccelesinin yevmî bir akçesiyle menzil-i mezbûrun meremmât-ı cüz’iyye ve külliyyesini meremmete mezbûr Mehmed Efendi müte‘ahhid olup izin murâd ettikde vech-i merkūm üzere izin verilmek vakfa enfa‘ olmağın ücret-i müeccelesinin yevmî bir akçesini menzil-i mezbûrun meremmâtına sarfa mezbûr Mehmed Efendi’ye tevliyetim hasebi ile izin verdim ve menzil-i mezbûrun arsasına kendi mâlıyla müceddeden her ne binâ ihdâs ederse icâre-i mu‘accelesine mahsûb olsun dedikde mütevellî-i mezbûrun kelimât-ı meşrûhasını mezbûr Mehmed Efendi dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olunup yed-i tâlibe def‘ olundu. Tahrîren fî-evâili Şevvâli’l-mükerrem li-sene selâse ve ışrîn ve elf. Şühûdü’l-hâl: Ali Çelebi b. Halil el-mi‘mâr, İbrahim Bey b. ( ) el-bevvâb, Mustafa Bey b. Abdullah el-bevvâb, Ferhad Bey b. ( ) el-câbî ve gayruhüm.