Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 203 Hüküm no: 135 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in yaptığı çardağı ve duvarı Ali b. el-Hac Alagöz’e sattığı Mahmiye-i İstanbul’da merhûm Sultân Süleyman Hân mahallesi sâkinlerinden olup menzil-i âti’l-beyâna mukaddemâ ber-vech-i meşrûtiyyet mütevellî olan Ahmed b. Mehmed meclis-i şer‘de işbu sâhibü’l-kitâb Ali b. el-Hâc Alagöz mahzarında ikrâr ve takrîr-i kelâm edip mahalle-i mezbûrede sâkine iken bundan akdem müteveffâ olan merhûm Hümâ Hatun bt. Ahmed hâl-i hayâtında mahalle-i mezbûrede vâki‘ üç bâb beyt-i ulvîyi ve bir mahzeni ve fırını ve bi’r-i mâyı ve kenîfi müştemil olup bir tarafdan merhûm Mehmed Ağa Vakfı ve bir tarafdan mezkûr Ali mülkü ve bir tarafdan tarîk-i hâs ve bir tarafdan tarîk-i âm ile mahdûd olan menzili mülkü iken vakfedip tevliyeti ve süknâsı evvelâ kendi nefsine ba‘dehâ bana ve fevt olan li-ebeveyn karındaşım Ali’ye ve bizim evlâdımıza ve evlâd-ı evlâd-ı evlâdımıza ve ba‘de’l-inkırâz Medîne-i Münevvere fukarâsına şart ve ta‘yîn edip fevt oldukdan sonra ber-mûceb-i şart-ı vâkıfe-i mûmâ-ileyhâ menzil-i merkūmda ben fevt karındaşım Ali ile alâ-tarîkı’l-münâsafati’ş-şirket üzere mutasarrıf olup sâkinler iken mezkûr Ali fevt olup evlâdı kalmamağın menzil-i merkūmdan mutasarrıf olduğu nısf hissesi Medîne-i Münevvere fukarâsına âid olup benim dahi evlâdım olmamağla menzil-i mezbûrdan nısf-ı âhar olan hisse-i şer‘iyyemin hakk-ı süknâsını taleben li’l-ecr ve’s-sevâb mine’l-meliki’l-vehhâb hâlâ Medîne fukarâsına fâriğ olmağla cümlesi Medîne-i Münevvere fukarâsına âid olan menzilde bundan akdem sâkin iken izn-i şer‘le kendi mâlımda[n] müceddeden binâ edip beynimizde ilm-i şer‘î ile ma‘lûm, tavsîfden mustağnî olan bir bâb mülk çardağımı ve bir taş duvarımı mezkûr Ali’ye yirmi bin akçeye bey‘-i bât ile bey‘ edip ol dahi iştirâ ve kabûl ettikden sonra [50a] ettikden sonra semen-i merkūmu mezkûr Ali yedinden bi’t-tamâm azh u kabz eyledim mukarrun-leh merkūm Ali dahi bi’l-müvâcehe tasdîk edicek isre’t-taleb sebt olundu. Fî-evâili Zilka‘de li-sene selâse ve ışrîn ve elf. Şühûdü’l-hâl: Mustafa Ağa b. Abdullah el-müteferrika el-mütevellî alâ-vakfi’l-merhûm Hasan Paşa, Ali Bey b. Abdullah el-cündî el-câbî alâ-vakfi’l-merhûm Hasan Paşa, Ferhad Bey b. Abdullah el-bevvâb el-câbî, Üveys b. Musa, Mehmed b. Ömer, Mustafa Çavuş b. Abdullah, Mustafa Çavuş b. Canan