Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 204 Hüküm no: 136 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Yedikule’deki evin Ayşe bt. Abdullah’a kiraya verilmesi Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Abdülmennan nâm bevvâbü’s-sultânî meclis-i şer‘-i kavîmde râfi‘atü hâze’l-kitâb Âişe bt. Abdullah nâm hatun mahzarında takrîr-i kelâm edip vakf-ı mezbûrdan mahmiye-i mezbûrda Yedikule kurbünde el-Hâc İlyas mahallesinde vâki‘ iki tarafı Akbıyık Vakfı’na ve bir tarafı Zülfikār Ağa mutasarrıf olduğu hadîkaya ve bir tarafı Hamza Kethüdâ Vakfı’na ve bir tarafı bazen Abdülgaffâr b. ( ) mülküne ve bir tarafı bazen Kâtibe Hatun bt. Abdullah mülküne ve bir tarafı tarîk-i hâssa müntehî olup iki bâb tahtânî ve iki bâb fevkānî evleri ve bir mağseli ve kenîfi ve bi’r-i mâyı ve hadîkayı müştemil olup arsasının Akbıyık Vakfı’na her sene kırk akçe mukāta‘ası olan menzili cümle tevâbi‘ ve levâhıkı ile ayda on beş akçe icâre-i müeccele ve üç bin altı yüz akçe icâre-i mu‘accele ile târîh-i kitâbdan merkūme Âişe’ye tevliyetim hasebi ile îcâr edip ol dahi vech-i meşrûh üzere istîcâr eyledikden sonra icâre-i mu‘accelesi olan meblağ-ı mezbûr üç bin altı yüz akçeyi vakf-ı mezbûr için merkūme Âişe yedinden bi’t-tamâm ahz u kabz eyledim ba‘de’l-yevm menzil-i merkūma sâir emsâli gibi mutasarrıfe olsun dedikde mütevellî-i mezbûrun ber-vech-i meşrûh sudûr eden ikrârını müste’cire-i merkūme Âişe dahi vicâhen tasdîk edicek mâ-hüve’l-vâkı‘ isre’t-taleb ketb olundu. Tahrîren fî-evâili Zilka‘deti’ş-şerîfe li-sene selâse ve ışrîn ve elf. Şühûdü’l-hâl: Yusuf Ağa b. ( ), Ali Çelebi b. ( ), Mustafa b. ( ), Ahmed b. Mahmud, Derviş Çavuş b. Durmuş ve gayruhüm.