Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 205 Hüküm no: 138 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Sultan Süleyman Han mahallesindeki evin Ali Çelebi b. Alagöz tarafından kiralanması Mahrûse-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey [b.] Abdullah meclis-i şer‘de işbu hâmilü’l-kitâb Ali Çelebi [b.] Alagöz nâm kimesne mahzarında ikrâr ve takrîr-i kelâm edip mahrûse-i mezbûre mahallâtından merhûm ve mağfûrun-leh Sultân Süleyman Hân mahallesinde vâki‘ bir tarafdan Mehmed Ağa Vakfı ile bir tarafdan mezkûr Ali Çelebi ile bir tarafdan tarîk-i hâs ve bir tarafdan tarîk-i âm ile mahdûd olup üç beyt-i ulvîyi ve bir mahzeni ve fırını ve bi’r-i mâyı ve kenîfi müştemil olan mülk menzili bundan akdem Hümâ bt. Ahmed nâm kendiye ba‘dehâ evlâdına ve evlâd-ı evlâdına ba‘de’l-inkırâz Medîne-i Münevvere fukarâsına ve şart eylemeğin evlâdından Ahmed b. Mehmed nâm kimesne menzil-i mezbûrda meşrûtiyyet üzere sâkin iken menzil-i mezbûrun arsasına kendi mâlından bazı ebniye ihdâs edip cümle ebniye-i muhadeseye yirmi bin akçe tahmîn olundukda mezbûr Ahmed ebniye-i mezkûresini yirmi bin akçeye mezkûr Ali’ye bey‘ edip ve meşrûtu olan vakf-ı sâbıkdan dahi ferâğ ve iskāt-ı hak edip tevliyetim hasebiyle bana teslîm etmeğin mezbûr Ali Çelebi dahi bin yirmi akçeye iştirâ eylediği ebniye-i mezkûre vakfın olup kendinin icâre-i mu‘accelesi olmak üzere menzil-i mezbûrun cümlesini yevmî üç akçe icâre-i müeccele ve üç bin akçe dahi icâre-i mu‘accele ile istîcâra tâlib olup ben dahi menzil-i mezbûru târîh-i kitâbdan beher şehr doksanar akçeye îcâr ettim ve icâre-i mu‘accelesi olan meblağ-ı mezbûr üç bin fıddî Osmânî akçeyi merkūm Ali Çelebi yedinden bi’t-tamâm alıp kabz eyledim mukaddemâ ebniye-i mezkûre için mezbûr Ahmed’e verdiği yirmi bin akçe ile hâlâ bana teslîm ettiği üç bin akçe ki cem‘an yirmi üç bin akçe <> mezbûr Ali Çelebi’nin menzil-i merkūmda icâre-i mu‘accelesi oldu ve ücret-i müeccelesinin yevmî bir akçesini menzil-i mezbûrun meremmâtına sarfa ve arsasında kendi mâlıyla her ne binâ ederse ettiği binâ vakfın olup icâre-i muaccelesine zammolmak üzere binâya ve meremmâta mezbûr Ali Çelebi’ye izin verdim dedikde mütevellî-i mezbûrun ikrârını müste’cir-i mezbûr tasdîk ettikde kayd olundu. Tahrîren fî-gurreti Zilka‘deti’ş-şerîfe li-sene 1023. Şühûdü’l-hâl: Ali Çelebi b. Halil el-mi‘mâr, Hüseyin Çelebi b. Ömer, Mustafa b. ( ) el-kâtib, Ferhad Bey b. Abdullah el-bevvâb ve gayruhüm