Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 286 Hüküm no: 244 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palu hakimi Cemşid Bey ve oğlu Hüseyin Can Bey Vakıfları gelirlerinin taksimine dair aile arasında çıkan anlaşmazlık Anadolu’da vâki‘ Ma‘âdin-i hümâyûn-ı Şâhâne merbûtâtından ve Harput kazâsı mülhakātından Palu kazâsı ümerâsından olup kazâ-i mezbûrda medfûn ashâb-ı hayrâtdan derûn-ı arzuhâlde mezkûr merhûm Cemşid Beyoğlu merhûm Hüseyin Can Bey dördüncü batnında olan oğlu İbrahim Bey evlâdından Nasır Paşa’nın evlâdından İbrahim Paşa’nın oğlu İsmail Bey evlâdından Hacı Ali Bey sulbî evlâdından ya‘ni merhûm-ı mezbûr Cemşid Bey onuncu batnında mevcûd evlâd-ı zükûrundan olduğu mütehakkık olan sâhib-i arzuhâl Abdullah Bey yine mezbûr İsmail Bey evlâdından Hacı Devletşah Bey oğullarından kezâlik merhûm-ı merkūm Çemşid Bey onuncu batnında mevcûd olan zükûrundan olduğu zâhir olan kezâlik sâhib-i arzuhâl Hamdullah Bey hâzır olduğu hâlde evvelâ Salı günü huzûr-ı hazret-i fetvâ-penâhîde ve ba‘dehu bi’r-râzı Bâb-ı hazret-i müşârün-ileyhde Anadolu mutasarrıfları dâ‘îlerine tahsîs buyurulan dâirede bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi ile bi’l-ma‘iyye akdolunan meclis-i şer‘-i münîrde zikri âtî vakfın bi’l-meşrûta mütevellîleri yine mûmâ-ileyh Feyzi Paşa’nın evlâdından es-Seyyid Mehmed Bey oğlu es-Seyyid İskender Bey oğullarından es-Seyyid el-Hâc Mehmed Bey evlâdından kezâlik merhûm-ı merkūm Cemşid Bey onuncu batında mevcûd evlâd-ı zükûrundan olduğu nümâyân olan es-Seyyid Ahmed Bey ile yine mezbûr es-Seyyid el-Hâc Mehmed Bey’in evlâdından olup bundan akdem vefât eden es-Seyyid Abdülvekil Bey oğulları ya‘ni merhûm-ı mezbûrun on birinci batnında mevcûd evlâd-ı mürûrundan oldukları mütehakkık olan es-Seyyid Ömer Bey ve es-Seyyid Ferşad Bey ve yine mezbûr es-Seyyid el-Hâc Mehmed Bey’in diğer oğlu müteveffâ es-Seyyid İskender Bey oğlu ve kezâlik on birinci batında mevcûd evlâd-ı zükûrundan olduğu zâhir olan es-Seyyid Mehmed Sadık Bey ve kezâlik mezbûr es-Seyyid el-Hâc Mehmed Bey âhar oğlu ve müteveffâ es-Seyyid Selim Bey oğulları ve yine on birinci batında mevcûd evlâd-ı zükûrundan oldukları nümâyân olan es-Seyyid Mehmed Bey ve es-Seyyid Timur Bey’den her birinin taraflarından husûs-ı âtîde bâ-hüccet vekîlleri olduğu Müftüzâde es-Seyyid Mustafa Efendi b. Mehmed Efendi Nabizâde? Ali Ağa b. İshak nâm kimesneler şehâdetleriyle mahzar-ı hasm-ı şer‘îde ber-nehc-i şer‘î sâbit ve sübût-ı vekâletine hükm-i şer‘î lâhık olan Hüseyin Bey b. el-Hâc Nuh Bey muvâcehesinde zikr olunan Palu kazâsında vâki‘ cedd-i a‘lâlarımız merhûmân-ı mezbûrân Cemşid Bey ve Hüseyin Can Bey’den her birinin binâ eyledikleri câmi‘-i şerîf ve medrese-i münîf ve iki Bâb Han sebîlleri vakıflarına merbût zikr olunan Palu <> kazâsı kurâsından Sığam? ve Sekrat ve Tilik? ve Tırfa? ve Habap? ve Tebşir? ve Habas [Abasan] karyeleri ile kurâ-i mezbûreye merbût mezâri‘ vakıflarının vakfiye-i ma‘mulün-bihâsı olmayıp lâkin kadîmden kurâ ve mezâri‘-i merkūmeden zikirleri sebkat eden Sığam ve Sekrat ve Tilik ve Tırfa karyeleri ve mezâri‘inin gallesi evlâd-ı vâkıfân-ı mezbûrândan merkūm İbrahim Bey sulbî evlâdından Halil Bey ile mezbûr İbrahim Paşa’nın evlâd-ı zükûruna ve mârru’z-zikr Habap ve Tebşir? karyelerinin gallesi yine evlâd-ı vâkıfân-ı merkūmândan merkūm es-Seyyid Mehmed Bey b. el-mezbûr Feyzi Paşa’nın kezâlik evlâd-ı zükûruna ve evlâd-ı zükûrunun evlâd-ı zükûruna ve mârrü’l-beyân Habas [Abasan] karyesinin gallesi dahi mürtezikaya meşrût olmak üzere zabt ve tasarruf olunagelip el-hâletü hâzihî vech-i muharrer üzere zikirleri mürûr eden Sığam ve Sekrat ve Tilik ve Tırfa karyeleri ve mezâri‘inin gallesi benimle hâzır-ı mezbûr Cemşid Bey’in on birinci batnında mevcûd olan zükûrundan Haşim Bey ve li-ebeveyn er karındaşım Necib Bey ve âhar li-ebeveyn karındaşım müteveffâ diğer İbrahim Bey’in sulbî oğulları Said Bey, İbrahim Bey ve ceddim Hamdullah Bey’in li-ebeveyn er karındaşı diğer Mehmed Bey ve yine mezbûr İsmail Bey’in evlâdından el-Hâc Tahir Bey’in oğlu âhar İsmail Bey oğulları Cemşid Bey ve Tahir Bey’den herbirimizin <> ve ecdâd-ı sâlifelerimizin ve bâlâda zikr olunan Habap ve Tebşir karyelerinin gallesini dahi müvekkilûn-ı merkūmûn ve ecdâd-ı sâbıkālarının ve zikirleri mürûr eden Habas karyesinin gallesi mürtezikanın ber-mûceb-i şart-ı vâkıfân merkūmân kadîmden beri uhde-i tasarrufumuzda olup ancak müvekkilûn-ı merkūmûn bu esnâda sâlifü’l-beyân ve Sığam ve Sekrat ve Tilik ve Tırfa karyeleri ve mezâri‘inin gallesine bi-gayr-ı hakkın müdâhale ve ber-minvâl-i meşrûh tasarrufumuza mümâna‘at etmeleriyle suâl olunup ber-vech-i muharrer vâki‘ olan mümâna‘atları men‘ olunmak üzere müvekkilûn-ı merkūmûna izâfetle vekîl-i merkūm Hüseyin Bey’e tenbîh olunmak matlûbumuzdur deyü hâzır-ı merkūm Hamdullah Bey’in tasdîkiyle ma‘an da‘vâ eyledikde vekîl-i mezbûr dahi cevâbında müdde‘iyân-ı mezbûrân ile gāibûn-ı merkūmûndan her biri vech-i meşrûh üzere evlâd-ı vâkıfân-ı mezbûrânan olup galle-i mezkûreye evlâdiyet ve meşrûtiyet üzere mutasarrıflar olduklarını bi’l-vekâle ikrâr ve i‘tirâf edip lâkin mücerred vakf-ı mezkûrun ber-vech-i meşrûh vakfiye-i ma‘mûlün-bihâsı olmadığından vakf-ı mezkûrun evlâdiyet ve meşrûtiyet üzere tevliyeti ancak müvekkillerim merkūmûndan mezbûr Ahmed Bey ile mezbûrûn es-Seyyid Ömer ve es-Seyyid Ferşad ve es-Seyyid Mehmed Sadık ve es-Seyyid Mehmed ve es-Seyyid Timur beylerin pederleri müteveffûn-ı merkūmûn es-Seyyid Abdülvekil ve es-Seyyid İskender ve es-Seyyid Selim Beyler ile karındaşları müteveffâ es-Seyyid Feyzullah Bey’in bâ-berât-ı âlîşân hayatlarında uhde-i tasarruflarında olduğuna mebnî gallât-ı merkūmun müstakıllen müvekkillerim merkūmûnun evlâdiyet ve meşrûtiyet üzere ahz ve tasarrufları iktizâ eder deyü amel-i kadîm müdde‘iyân-ı mezbûrânın takrîr-i meşrûhları üzere olduğu sikāt-ı Müslimînden ve kazâ-i mezbûr ahâlîsinden Halil Ağazâde İbrahim Ağa b. Mehmed ve İmâmzâde es-Seyyid el-Hâc Mehmed Efendi b. el-Hâc İbrahim ve Habeşoğlu Ahmed Ağa b. Sadık ve es-Seyyid Mustafa Efendi b. Osman ve Kürdoğlu Mehmed Ağa b. Hasan ve Somiloğlu? Mehmed Ağa b. ( ) ve mezbûreden Ağa b. Mehmed ve Yusuf Efendi b. Abdülrefi‘ [70a] ve Mehmed Sadık Ağa b. Abdullah ve Atuş Ali Ağa b. Abdullah ve kazâ-i mezbûra tâbi‘ Masad? karyesi ahâlîsinden es-Seyyid İsmail Ağa b. Süm‘uddîn nâm kimesnelerin alâ-tarîkı’ş-şehâde ihbârlarıyla dahi zâhir iken vekîl-i mezbûr Hüseyin Bey’in takrîr-i meşrûhu üzere bi’l-vekâle îrâd eylediği kelâmı def‘a sâlih cevâb-ı şer‘î olmadığı kendüye ba‘de’t-tefhîm mûcebince ber-vech-i muharrer te‘âmül-i kadîm zikr olunan Sığam ve Sekrat ve Tilik ve Tırfa karyeleri ve mezâri‘i gallâtının müdde‘iyân-ı mezbûrân Abdullah Bey ve Hamdullah Bey ile gāibûn-ı mezbûrûn Haşim Bey ve Necib Bey ve Said Bey ve âhar İbrahim Bey ve diğer Mehmed Bey ve Cemşid Bey ve Zahir Bey’den herbirinin ahz ve tasarruflarına mümâna‘at etmemek üzere müvekkilûn-ı merkūmûna izâfetle vekîl-i merkūm Hüseyin Bey’e tenbîh olunduğu huzûr-ı [âlîlerine i‘lâm olundu]. Fî 7 C sene 1257.