Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 289 Hüküm no: 245 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sandıkçı Ahmed’in Hıfzı Mustafa Paşa’da olan alacağının varislerince tahsil olunması Ma‘rûz, Derûn-ı i‘lâmdan isimleri mezkûr müteveffâ Sandıkçı Ahmed b. el-Hâc Ali b. Abdullah’ın verese-i münhasırasından zevce-i menkûha-i metrûkesi Gözlika bt. Mustafa nâm hatun ile sulbî kebîr oğlu Ali Bey ve sulbiye kebîre kızları Âişe ve Fâtıma hatunlar taraflarından vekîl-i müsbet-i şer‘îleri Abdülkerim Ağa b. Bağran? nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kezâlik derûn-ı i‘lâmda isimleri mezkûr atûfetlü Hıfzı Mustafa Paşa hazretleri taraflarından husûs-ı âti’l-beyânda vekîl-i müseccel-i şer‘îleri Hasan Ağa b. Hasan muvâcehesinde derûn-ı i‘lâm-ı mezkûrda tasrîh ve beyân olunduğu üzere müvekkillerim mezbûrûnun müvekkil-i müşârün-ileyh zimmetlerinde mahkûmün-bih alacakları olan dört bin altı yüz yetmiş altı guruş müvekkil-i müşârün-ileyhe bu def‘a vekîl-i mezbûr Hasan Ağa yediyle bana def‘ ü teslîm, ben dahi yedlerinden bi’l-vekâle tamâmen ve kâmilen ahz u kabz edip min-ba‘d meblağ-ı mahkûmün-bih-i mezkûr dört bin altı yüz yetmiş guruşdan müvekkillerim mezbûrûnun paşa-yı müşârün-ileyh zimmetlerinde bir akçe ve bir habbe alacakları kalmamağla bi’l-cümle husûs-ı mezkûre müte‘allika da‘vâdan müvekkil-i Paşa-yı müşârün-ileyhe izâfetle vekîl-i merkūm Hasan Ağa’nın zimmetini bi’l-vekâle kabûlü hâvî ibrâ ve iskāt eyledim deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 11 C sene [12]57.