Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 207 Hüküm no: 140 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mümine Hatun’un Tahtaminare mahallesindeki Haremeyn Evkafı’na ait oturduğu ev için hüccet talebi Dârü’s-saltanati’l-aliyye Kostantıniyye el-mahmiyede Tahtaminâre mahallesi sâkinelerinden işbu sâhibetü’l-kitâb Mümine bt. Hamza Hatun’un mahmiye-i mezbûrede Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Abdülmennan nâm bevvâb-ı sultânînin hat ve hatemini müştemil tezkiresi ile meclis-i şer‘-i şerîfe gelip takrîr-i kelâm edip vakf-ı mezbûrdan mahalle-i mezbûrede Çavuşbaşı Mescidi kurbünde vâki‘ lede’l-cîrân ma‘lûmü’l-hudûd olan vakıf menzilde bundan akdem yevmî iki akçe icâre-i müeccele ile sâkin olan el-Hâc Sefer nâm kimesne celâ-yı vatan etmekle menzil-i mezbûrun bazı mevâzi‘i harâba müşrif olup ta‘mîr ve meremmete cânib-i vakıfda[n] müsâ‘ade olmamağın sene-i ışrîn ve elf Zilhiccesi evâhirinde mütevellî-i merkūm menzil-i mezkûru yevmî iki akçe icâre-i müeccele ile bana îcâr edip muhtâc-ı ta‘mîr olan mevâzi‘ini kendi mâlımla ta‘mîr ve termîm edip her ne mikdâr akçe harc u sarf edersem menzil-i merkūmda icâre-i mu‘acceleme mahsûb olmak üzere dahi izin verilip yedime hat ve hatemini müştemil ve târîh-i mezkûr ile müverrah temessük verilmiş idi hâlâ nazar olunup mûcebince kıbel-i şer‘den dahi hüccet-i şer‘iyye tahrîr olunması taleb ederim deyu mütevellî-i mezbûrun hat ve hatemini müştemil ve târîh-i mezkûr ile müverrah temessük ibrâz edip nazar olundukda min-külli’l-vücûh mefhûmu merkūme Mümine’nin takrîrine muvâfık bulunmağın mûcebince bu vesîka isre’t-taleb ketb olundu. Tahrîren fi’l-yevmi’s-sâbi‘ ve ışrîn min-Zilka‘deti’ş-şerîfe min-şühûri sene selâse ve ışrîn ve elf. Şühûdü’l-hâl: Abdullah Çelebi b. İbrahim, Mustafa b. Hasan, Muslu Çelebi b. Kasım ve gayruhüm.