Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 208 Hüküm no: 141 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Ayasofya-i kebir mahallesindeki evin Mustafa b. Abdullah tarafından kiralanması Vazaha’l-emrü hasbemâ hürrire fîhi zeberahü’l-fakīru ileyhi subhânehû Abdürrezzak b. Halil el-me’mûr bi-müfettişi’l-evkāf -ufiye-anhümâ- Mahrûse-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hasan Bey b. Mehmed nâm bevvâb-ı sultânî mahfil-i kazâda işbu sâhibü’l-kitâb Mustafa b. Abdullah nâm kimesne mahzarında ikrâr ve takrîr-i kelâm edip evkāf-ı mezbûreden Ayasofya-i kebîr mahallesinde vâki‘ lede’l-ahâlî ma‘lûmü’l-hudûd olup fevkānî ve tahtânî büyût-ı müte‘addide ve matbah ve bi’r-i mâyı ve altında üç bâb dükkânları müştemil olan menzil hâlâ mahlûl olmağın mezkûr Mustafa altı bin akçe icâre-i mu‘accele ve yevmî altı akçe ücret-i müeccele ile akd-i icâreye tâlib oldukda menzil-i mezbûru târîh-i kitâbdan vech-i meşrûh üzere yevmî altı akçe ücret ile mezkûr Mustafa’ya îcâr eyleyip ol dahi kabûl ve istîcâr eyledikden sonra ücret-i mu‘accele-i mezbûreyi mezkûr Mustafa yedinden bi’t-tamâm vakf için alıp kabz eyledim. Mâdâm ki ta‘yîn olunan ücret-i müeccelesin mâh be-mâh cânib-i vakfa edâ ve teslîm eyleye tasarrufuna kimesne mâni‘ olmaya dedikde ba‘de’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fî-evâili âhiri’r-rebî‘ayn li-sene selâse ve ışrîn ve elf. Şühûdü’l-hâl: Mevlânâ Ebubekir b. Ramazan, Mehmed b. Ahmed, Mustafa Bey b. ( ), Ali b. Ahmed ve gayruhüm.