Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 208 Hüküm no: 142 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşiktaş’ta Beytülmâl Emini Mustafa Çavuş’un el koyduğu evin Haremeyn Evkafı’na ait olduğu Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘de mahmiye-i Galata’da hâlâ beytülmâl emîni olup menzil-i âti’z-zikr yedinde idiği şer‘an sâbit olan zahrü’l-emâsil ve’l-akrân Mustafa Çavuş b. ( ) mahzarında üzerine tasvîr-i da‘vâ edip mahmiye-i mezbûre kazâsına tâbi‘ kasaba-i Beşiktaş’da Ekmekçibaşı mahallesinde vâki‘ bir tarafdan Mehmed b. Keyvan nâm kimesne mülkü ile bir tarafdan vâdi ile iki tarafdan tarîk-i âm ile mahdûd olup fevkānî iki evi ve bir sofayı ve bir kilârı ve bir dahlîzi ve tahtânî iki odayı ve bir ahırı ve bir fırını ve bir su kuyusunu ve iki kenîfi ve bahçeyi ve bir küçük odayı ve muhavvatayı müştemil olup cümle tûlen yetmiş iki zirâ‘ ve arzen otuz beş zirâ‘ arsası olan menzil bundan akdem Mehmed Bey b. Ali nâm cündînin mülkü iken târîh-i kitâbdan sekiz yıl mukaddem evvelâ kendi nefsine ba‘dehû utekāsına ba‘de’l-inkırâz Medîne-i Münevvere fukarâsına vakf ve şart edip teslîm-i mütevellî ve tescîl-i şer‘î edip hâlâ kendi ve utekāsı münkariz olup menzil-i mezbûrun tasarrufu Medîne-i Münevvere fukarâsına âid olmuşiken mezbûr Mustafa Çavuş bi-gayrı vech-i şer‘î vaz‘-ı yed eylemişdir. Vâki‘ hâl suâl olunup kasr-ı yed ettirilmesin taleb ederim dedikde gıbbe’s-suâl emîn-i mezbûr çavuş mezbûr Mehmed Bey fevt oldukda vâris-i ma‘rûfu olmayıp terekesi beytülmâle âid olmağın menzil-i mezbûra emâneten vaz‘-ı yed eyledim vech-i merkūm üzere vakf ve şart eylediği ma‘lûmum değildir deyu münkir olup mütevellî-i mezbûrdan beyyine taleb olundukda mahalle-i mezbûre sâkinlerinden Ya‘kub Efendi b. Mahmud el-Kādî ve İbrahim Ağa b. Abdullah ve diğer İbrahim b. Hudâverdi nâm kimesneler meclis-i şer‘a li-ecli’ş-şehâde hâzırûn olup fi’l-vâki‘ mezbûr Mehmed Bey hâl-i hayâtında târîh-i mezbûrda mülkü iken menzil-i mezbûru cümle tevâbi‘i ile bizim huzûrumuzda evvelâ kendi nefsine ba‘dehû utekāsına ba‘de’l-inkırâz Medîne-i Münevvere fukarâsına vakf ve şart ve teslîm-i mütevellî edip ve tescîl-i şer‘î dahi ettirip menzil-i mezbûr vakıfdır biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ oldukda mûcebiyle hükmolunup mâ-hüve’l-vâkı‘ bi’t-taleb ketb olundu. Tahrîren fi’t-târîhi’l-mezbûr. Şühûdü’l-hâl: Mustafa Bey b. Abdullah, Ferhad Bey b. Abdullah, Ali Çelebi b. Halil, Ahmed Halîfe b. ( ) ve gayruhüm.