Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 209 Hüküm no: 143 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın satın aldığı evin daha önce Haremeyn Evkafı’na vakfedildiği El-emru kemâ hürrire fîhi zebera’l-fakīru ileyhi sübhânehû Ali b. Abdürrauf el-Kādî bi-medîneti Galata <>el-mahrûsa -ufiye anhümâ- Der-i âlî bevvâblarından olup bi’l-fi‘il Haremeyn-i Muhteremeyn mütevellîsi olan fahrü’l-akrân Hasan Bey b. Mehmed mahfil-i kazâda menzil-i âti’l-beyâna vâzı‘ü’l-yed olduğu şer‘an sâbit olan Mustafa b. Abdullah mahzarında takrîr-i da‘vâ edip mahmiye-i Galata’da Sultân Bayezid mahallesinde vâki‘ iki tarafı İskender Bey Vakfı ve tarafeynden tarîk-i âm ile mahdûd olup iki ulvî ve süflî beyti ve bir sofayı ve bi’r-i mâyı ve kenîfi muhtevî menzil mukaddemâ işbu hâzır bi’l-meclis olan İbrahim b. Abdullah’ı i‘tâk eden Emine bt. Abdullah nâm hatunun mülkü iken mezbûre Emine Hatun bin sekiz senesi Zilhiccesi’nin evâsıtında menzil-i mahdûd-ı mezkûru cümle tevâbi‘ ve levâhıkı ile vakf-ı sahîh-i şer‘î ile vakfedip süknâsını evvelâ kendi nefsine kendi vefâtından sonra mezbûr İbrahim’e ba‘dehû evlâdına ve evlâd-ı evlâdına ve evlâd-ı evlâd-ı evlâdına şart edip evlâdı münkariz oldukdan sonra menzil-i mezbûr Medîne-i Münevvere evkāfı mütevellîsi yediyle ecr-i misli ile îcâr olunup hâsıl olan ücreti fukarâ-yı Medîne-i Münevvere’ye irsâl oluna deyu şart edip teslîmü’l-mütevellî ve tescîl-i şer‘î etmişdir hâlâ mezbûre Emine Hatun fevt olup menzil-i mezbûrun süknâsı hâlâ mezbûr İbrahim’in hakk-ı meşrûtu iken merkūm Mustafa bi gayr-ı vech-i şer‘î vaz‘-ı yed edip tasarrufuna mâni‘ olur suâl olunup kasr-ı yedine tenbîh olunmak taleb ederim dedikde gıbbe’s-suâl mersûm Mustafa cevâbında fi’l-vâki‘ menzil-i mezbûr mukaddemâ sâlifü’z-zikr Emine Hatun’un mülkü idiği vâki‘dir lâkin merkūm[e] Emine Hatun menzil-i mezbûru bin dokuz senesi Cemâziyelûlâsı’nın evâsıtında otuz bin nakd râyic fi’l-vakt akçeye bey‘-i bâtt-ı sahîh-i şer‘î ile bana bey‘ ve teslîm edip semen-i mezbûru bi’t-tamâm yedimden kabz etmişdir. Mülk-i müşterâmdır. Ol vechile mutasarrıfım benim iştirâ eylediğim târîhden mukaddem mütevellî mûmâ-ileyhin beyân ettiği üzere vakfolduğu ma‘lûmum değildir demekle müdde‘î-i merkūmdan takrîrini muvâfık beyyine taleb olundukda udûl-i Müslimînden Mehmed Halîfe b. el-Hâc Ali el-imâm ve Mustafa Bey b. Pervâne el-cündî ve Şa‘ban b. Abdullah li-ecli’ş-şehâde hâzırûn olup gıbbe’l-istişhâdi’ş-şer‘î fi’l-hakīka mesfûre Emine Hatun kemâl-i sıhhat üzere ve cevâz-ı âmme-i tasarrufâtı üzere bin sekiz senesi Zilhiccesi’nin evâsıtında bizim huzûrumuzda menzil-i mahdûd-ı mezkûru bi cümleti’t-tevâbi‘ vakf-ı sahîh-i şer‘île vakfedip minvâl-i mufassal üzere süknâsını evvelâ nefsine ba‘dehû mu‘takı olan mezbûr İbrahim’e ve İbrahim’in evlâdına ve evlâd-ı evlâdına ve evlâd-ı evlâd-ı evlâdına şart edip ba‘de’l-inkırâzi’l-evlâd Medîne-i Münevvere evkāfı mütevellîsi yediyle ecr-i misli ile îcâr olunup ücreti fukarâ-yı Medîne-i Münevvere’ye irsâl oluna deyu şart edip teslîm ile’l-mütevellî ve tescîl-i şer‘î etti biz bu husûsa şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de ri‘âyetihî şerâiti’l-kabûl şehâdetleri makbûle olup mûcebiyle mezbûr Mustafa’nın şirâsı târîhinden beş ay mukaddem olmağla menzil-i mezbûrun vech-i meşrûh üzere vakfiyetine şer‘an hüküm ve ba‘de’l-yevm menzil-i mezbûrdan kasr-ı yed etmek üzere mezkûr Mustafa’ya kıbel-i şer‘den tenbîh olunup mâ-hüve’l-vâkı‘ bi’t-taleb kayd olundu. Tahrîren fî-evâili Zilhicce sene 1023. Şühûdü’l-hâl: Zahrü’l-a‘yân İsmail Ağa b. Ali Çelebi el-müteferrika, Mehmed Ağa b. Sinan el-bevvâb, Hüseyin Beşe b. Abdullah er-râcil, Mehmed Ağa b. Mehmed el-bevvâbü’s-sultânî, Hasan b. Hüseyin, Mustafa b. Ali, Ali b. Ahmed, Mehmed b. Abdi, Sefer b. Abdullah, Bayram b. Abdullah, Mustafa b. Ali, Ali b. Ahmed, Mehmed b. Abdi, Sefer b. Abdullah.