Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 211 Hüküm no: 144 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Bayezid’ın oturduğu Haremeyn Evkafı’na ait Nahılbend mahallesindeki evde yaptığı tadilatın keşfi Haremeyn-i Şerîfeyn Evkāfı’ndan olup mahrûse-i İstanbul’da Nahılbend mahallesinde vâki‘ lede’l-ahâlî ma‘lûmü’l-hudûd olup beher şerh ( ) akçe icâre-i müeccelesi olan menzilin icâre-i mu‘accele ile müste’ciri olup bi’l-fi‘il kapıcılar kâtibi olan işbu hâfızü’l-kitâb fahrü’l-emâcid ve’l-ekârim Hüseyin Efendi b. Bayezid meclis-i şer‘a gelip takrîr-i kelâm ve ta‘bîr ani’l-merâm edip bundan akdem menzil-i mezbûrda bir hamâm ve bir fırın ve bir ahır ve bir otluk anbârı ihdâs olunmağa muhtâc olmağla icâre-i mu‘acceleye mahsûb olmak üzere kendi mâlımdan binâ edip cümlesine altmış iki bin üç yüz yirmi akçe harc [u] sarf eylemiş idim hâlâ kıbel-i şer‘den üzerine varılıp ebniye-i mezkûrenin meblağ-ı mezbûra tahammülü var mıdır keşf ve tahrîr olunmasın taleb ederim dedikde cânib-i şer‘den Mevlânâ Mehmed Efendi b. Süleyman el-müderris ve hâssa mi‘mârlardan üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp evkāf-ı mezbûreye hâlâ mütevellî olan Hasan Bey b. Mehmed nâm bevvâb-ı sultânî mahzarında keşf olundukda fi’l-vâki‘ tûlen ve arzen üç zirâ‘ iki halvetli bir hamâm ve bir câmekân ve mermer döşeme ve ıssı ve soğuk su hazîneleri külhân ve kazga[n] ve bir fırın ve ahır ve otluk anbârı müceddeden binâ ve ihdâs olunmağın bu cümleye sarf olunan taşın ve kerestenin ve mismârın ve neccâriyye ve ırgadiyye ve hammâliyyesinin meblağ-ı mezbûr altmış iki bin üç yüz yirmi akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerinde mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-hüve’l-vâkı‘ bi’t-taleb ketb olundu. Tahrîren fî-evâili Muharremi’l-harâm li-sene erba‘a ve ışrîn ve elf. Şühûdü’l-hâl: Mustafa Bey b. İskender el-bevvâb, Ahmed b. Abdullah, Hüseyin Çelebi b. Ömer, Ali b. Abdullah ve gayruhüm.