Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 212 Hüküm no: 146 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Rıdvan’ın Haremeyn Evkafı’na ait Sarı Nasuh mahallesindeki evi kiraladığı Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hasan Bey b. Mehmed nâm bevvâb-ı sultânî meclis-i şer‘-i şerîfde işbu hâmilü’l-kitâb Mustafa Çelebi b. Rıdvan nâm kimesne tarafından husûs-ı âti’l-beyâna vekîl olup nehc-i şer‘î üzere vekâleti sâbite olan Süleyman Bey b. Mehmed nâm kimesne mahzarında ikrâr ve takrîr-i kelâm edip evkāf-ı mezbûreden olup mahrûse-i İstanbul’da Sarı Nasuh mahallesinde vâki‘ bir tarafdan evkāf-ı mezbûreye, bir tarafdan mahalle-i mezbûre imâmına meşrût vakıf menzile ve iki tarafı tarîk-i âmma müntehî olup fevkānî ve tahtânî iki beyt ve bir kenîfi ve muhavvatayı müştemil olan menzil bundan akdem Lâleruh bt. Abdullah nâm hatunun ayda on beş akçe icâre-i müeccele ve icâre-i mu‘accele ile tasarrufunda iken fevt olup îcârı lâzım geldikde müvekkil-i mezbûr Mustafa Çelebi b. ( ) iki bin sekiz yüz akçe icâre-i mu‘accele ve ayda otuz akçe icâre-i müeccele ile istîcâra tâlib olmağın ben dahi menzil-i mezbûru târîh-i kitâbdan ayda otuz akçe icâre-i müeccele ve iki bin sekiz yüz akçe icâre-i mu‘accele ile tevliyetim hasebi ile îcâr eyledim ol dahi istîcâr ve kabûl eyledikden sonra icâre-i mu‘accele olan meblağ-ı mezbûr iki bin sekiz yüz nakd râyicü’l-vakt akçeyi vekîl-i mezbûrdan bi’t-tamâm ve’l-kemâl alıp kabz eyledim min-ba‘d zikr olunan icâre-i müeccelesin cânib-i vakfa edâ edip ve menzil-i mezbûrda merkūm Mustafa Çelebi kendi mâlından her ne ihdâs ederse ettiği binâ vakfın ba‘dehû icâre-i müeccelesine mahsûb olmak üzere binâya izin verdim dedikde mütevellî-i mezbûrun ikrâr-ı meşrûhunu vekîl-i mezbûr dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olundu. Tahrîren fî-gurreti Muharremi’l-harâm li-sene erba‘a ve ışrîn ve elf. Şühûdü’l-hâl: Mahmud b. Hasan, Abdullah b. Hürrem el-imâm, Mustafa b. ( ) el-müezzin, el-Hâc Ferhad b. Abdullah, Muharrem b. Süleyman ve gayruhüm.