Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 213 Hüküm no: 147 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Beşiktaş’daki Ekmekçibaşı mahallesinde evin süknasının Peymane bt. Abdullah’a ait olduğu Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘-i şerîfde menzil-i âti’z-zikr yedinde idiği şer‘an sâbite olan Peymâne bt. Abdullah nâm hatun mahzarında üzerine tasvîr-i da‘vâ edip mahmiye-i Galata kazâsına tâbi‘ kasaba-i Beşiktaş’da Ekmekçibaşı mahallesinde vâki‘ bir tarafdan Mehmed b. Keyvan nâm kimesne mülkü ile bir tarafdan vâdi, iki tarafdan tarîk-i âm ile mahdûd olup fevkānî iki evi ve bir sofayı ve bir kilârı ve bir dahlîzi ve tahtânî iki odayı ve bir ahırı ve bir fırını ve bir su kuyusunu ve iki kenîfi ve bahçeyi ve bir küçük odayı ve muhavvatayı müştemil olup cümle tûlen yetmiş iki zirâ‘ ve arzen otuz beş zirâ‘ arsası olan menzil bundan akdem Mehmed Bey b. Ali nâm cündînin mülkü iken târîh-i kitâbdan sekiz yıl mukaddem evvelâ kendi nefsine ba‘dehû utekāsına ba‘de’l-inkırâz Medîne-i Münevvere fukarâsına vakf ve şart edip teslîm-i mütevellî ve tescîl-i şer‘î edip hâlâ kendi ve utekāsı münkariz olup menzil-i mezbûrun tasarrufu Medîne-i Münevvere fukarâsına âid olmuşiken mezbûre Peymâne bi gayr-ı vech-i şer‘î vaz‘-ı yed eylemişdir. Vâki‘ hâl suâl olunup kasr-ı yed ettirilmesin taleb ederim dedikde gıbbe’s-suâl mezbûre Peymâne cevâb verip fi’l-vâki‘ mezbûr Mehmed Bey menzil-i mezbûru vech-i muharrer üzere vakf ve şart edip ve ben vâkıf-ı mezbûrun mu‘tekası olmak ile menzil-i mezbûru ber-mûceb-i şart-ı vâkıf tasarruf ederim deyip mütevellî-i mezbûr istintâk mezbûre Peymâne vâkıf-ı mezbûrun mu‘tekası olduğunu münkir olup mezbûre Peymâne’den beyyine taleb olundukda mahalle-i mezbûre sâkinlerinden Ya‘kub Efendi b. Mahmud el-Kādî ve İbrahim Ağa b. Abdullah ve diğer İbrahim b. Hudâverdi nâm kimesneler meclis-i şer‘a li-ecli’ş-şehâde hâzırûn olup fi’l-vâki‘ vâkıf-ı mezbûr Mehmed Bey mezbûre Peymâne’yi mülkü iken bizim huzûrumuzda i‘tâk eyledi menzil-i mezbûrun süknâsı hakk-ı meşrûtudur biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda menzil-i mezbûr meşrûtiyyet üzere mezbûre Peymâne yedinde ibkā olunup mâ-hüve’l-vâkı‘ bi’t-taleb ketb olundu. Tahrîren fî-evâhiri Muharremi’l-harâm li-sene erba‘a ve ışrîn ve elf. Şühûdü’l-hâl: Mustafa Bey b. Abdullah, Ferhad Bey b. Abdullah, Ali Çelebi b. Halil, Ahmed Halîfe b. ( ) ve gayruhüm.