Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 214 Hüküm no: 148 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. Nasuh’un Harameyn Evkafı’na ait olan arsa üzerindeki evini Mahmud Çelebi b. Ali’ye sattığı Dergâh-ı âlî -dâme mahfûfen bi’l-me‘âlî- çavuşlarından fahrü’l-cüyûş Mustafa Çavuş b. Nasuh tarafından husûs-ı âti’l-beyânı ıkrârda vekâleti Pervâne Çavuş b. Abdullah ve Ca‘fer Beşe b. Abdullah şehâdetleri ile şer‘an sâbite olan Halil Çavuş b. Davud meclis-i şer‘-i hatîr-i lâzımü’t-tevkīrde hâfız-ı hâze’l-kitâbü’ş-şer‘î Altıpoğaçazâde demekle ma‘rûf fahrü’l-a‘yân Mahmud Çelebi b. Ali tarafından tasdîk-i âtîde vekâleti Kenan b. Abdullah ve Mehmed Bey b. Abdullah şehâdetleri ile şer‘an sâbite olan Süleyman Bey b. Mehmed mahzarında bi’t-tav‘i’s-sâf ikrâr u i‘tirâf edip müvekkilim mezbûr Mustafa Çavuş târîh-i kitâbdan üç yıl mukaddem Altıpoğaçazâde Câmi‘i mahallesinde arzı Medîne-i Münevvere fukarâsı evkāfından olup üzerinde vâki‘ binâsı tarîkü’ş-şirâ’ü’ş-şer‘î mülk-i mahzı olup yevmî iki akçe icâre-i müeccele ve icâre-i mu‘accele ile tasarrufunda olup bir tarafı merhûm Dalgıç Ahmed Paşa vakfı ve bir tarafı Altıpoğaçazâde Ahmed Paşa hazretleri mülkü ve tarafeyni tarîk-i âm ve hâs ile mahdûd menzilde vâki‘ mülk binâsını müvekkil-i mezbûr Mahmud Çelebi’ye otuz bin akçeye bey‘ ve kabz-ı semen edip ve arz-ı mezbûrede olan hakk-ı tasarrufundan merkūm Mahmud Çelebi’ye ma‘rifet-i mütevellî ile fâriğ edip mukābele-i ferâgat merkūm Mahmud Çelebi yedinden beş bin akçe kabz etmiş idi min-ba‘d binâ-yı mezbûr mülkü ve arz-ı mezbûre dahi hakk-ı tasarrufudur. Mâdâm ki icâreyi vakfa bî-kusûr edâ eyleye tasarrufuna mu‘âraza olunmaya deyu vekîl-i mezbûr Süleyman tarafından tasdîk-i sudûr etmeğin mâ-vaka‘a zabt olundu. Tahrîren fî-evâsıtı Saferi’l-hayr li-sene erba‘a ve ışrîn ve elf. Şühûdü’l-hâl: Fahrü’l-müderrisîni’l-kirâm Ahmed Efendi el-müderris el-Halebî? ve Pervâne Çavuş b. Abdullah, Sinan Bey b. ( ), Ahmed Bey b. ( ), Ca‘fer b. ( ) ve gayruhüm.