Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 215 Hüküm no: 149 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafına ait evin kiracısı Ali Çelebi b. Alagöz tarıfından yapılan tadilatın keşfi Haremeyn-i Şerîfeyn Evkāfı’ndan olup mahrûse-i İstanbul’da merhûm ve mağfûrun-leh Sultân Süleyman Hân -aleyhi’r-rahme ve’r-rıdvân- hazretlerinin mahallesinde vâki‘ lede’l-ahâlî ma‘lûmü’l-hudûd olup yevmî üç akçe icâre-i müeccele ve mu‘accele ile hâlâ müste’ciri olan işbu hâmilü’l-kitâb Ali Çelebi b. Alagöz nâm kimesne meclis-i şer‘a gelip takrîr-i kelâm ve ta‘bîr ani’l-merâm edip bundan akdem menzil-i mezbûr harâba müşrif olup meremmâta muhtâc oldukda kendi mâlımla ta‘mîr ve meremmet edip ba‘de kıymetini icâre-i mu‘acceleye mahsûb olmak üzere kıbel-i şer‘den izin verilmeğin ben dahi meremmât eylemişidim hâlâ kıbel-i şer‘den Mevlânâ Mehmed Efendi ve hâssa mi‘mârlardan üstâd Ali b. Halil irsâl olunup zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp evkāf-ı mezbûreye bi’l-fi‘il mütevellî olan el-Hâc Hasan Bey b. Mehmed nâm bevvâb-ı sultânî mahzarında keşf olundukda fi’l-vâki‘ tûlen on beş zirâ‘ ve kadden sekiz zirâ‘ taş duvarı tecdîd ve bazı sakfı ve tavanı ve tuğla ve döşemesi ve camları ve ocakları ve badanası meremmât olunmağın bu cümleye sarf olunan taşın ve kerestenin ve kiremidin kireç ve horasanisinin ve mismârının ve neccâriyye ve ırgadiyye ve hammâliyyesinin on altı bin üç yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-hüve’l-vâkı‘ bi’t-taleb ketb olundu. Tahrîren fî-evâili Rebî‘i’l-evvel sene erba‘a ve ışrîn ve elf. Şühûdü’l-hâl: Süleyman Çavuş b. Abdullah, Yahya Bey el-cündî, Ferhad b. Abdullah, Abdülgani b. Mehmed ve gayruhüm.