Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 289 Hüküm no: 246 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabakçı esnafından Petro’nun alacak iddiasından vazgeçmesi Ma‘rûz, Medîne-i Üsküdar’da Kavak İskelesi’nde vâki‘ güşâd olunan fabrikada tabak ve sâir edevât-ı Çin i‘mâl eden tâifeden arzuhâl eden Petro v. Kino nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde yine tâife-i mersûmeden derûn-ı arzuhâlde isimleri mastûr Kostandi v. Luka ve Kiryako v. Kostandi nâm zimmîler muvâcehelerinde zimmiyân-ı mersûmândan mersûm Kostandi zimmîye işbu sene-i mübâreke şehr-i Rebî‘ülevveli’nin yirminci günü fabrika-i mezkûrede bana hizmet etmek için ücretine mahsûb olmak üzere malımdan bin on altı guruş ve mersûm Kiryako zimmîye dört yüz yetmiş guruş ki cem‘an bin dört yüz seksen altı guruş def‘ ü teslîm eylediğimde onlar dahi ahz u kabz etmiş idi. El-hâletü hâzihî zimmiyân-ı mersûmân bana kat‘an hizmet etmemeleriyle ol vechile medfû‘um olan meblağ-ı mecmû‘-ı mezkûr bin dört yüz seksen altı guruşu zimmiyân-ı mersûmândan istirdâd ederim deyü inkârlarına mukārin tasaddî eylediğim da‘vâmdan rızâmla meccânen fâriğ olmamla bi’l-cümle husûs-ı mezkûra ve işbu târîhe gelince cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîl-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl [ve] huzûr-ı [âlîlerine i‘lâm olundu]. Fî 16 C sene [12]57.