Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 215 Hüküm no: 150 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ali’nin oturduğu Haremeyn Evkafı’na ait Bostancı mahallesindeki evde yaptığı tadilatın keşfi Mahmiye-i İstanbul’da Kadırga limanı kurbünde Bostancı mahallesinde sâkin sâhibü’l-kitâb Mehmed Çelebi b. Ali nâm yesârî meclis-i şer‘de takrîr-i kelâm edip Haremeyn-i Şerîfeyn Vakfı’ndan mahalle-i mezbûrede vâki‘ lede’l-cîrân ma‘lûmü’l-hudûd olup icâre-i mu‘accele ve yevmî üç buçuk akçe icâre-i müeccele ile taht-ı tasarrufunda olan menzilin bazı mevâzi‘i harâba müşrif olup ta‘mîre muhtâc oldukda kendi mâlımla ta‘mîr edip harc ettiğim meblağ cânib-i vakıfda icâre-i muacceleme mahsûb olunmak üzere bundan akdem izn-i şer‘le ve ma‘rifet-i mütevellî ile bazı mevâzi‘i ta‘mîr ve meremmet etmişidim hâlâ kıbel-i şer‘den üzerine varılıp ne mikdâr akçeye tahammülü vardır keşf olunup ba‘de’l-keşf vech-i meşrûh üzere harc ettiğim meblağ cânib-i vakıfda icâre-i mu‘acceleme mahsûb olmak üzere izin taleb ederim dedikde savb-ı şer‘den Mevlânâ Mustafa Efendi [ve] hâssa mi‘mârlardan üstâd Ali irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp keşf ve müşâhede olundukda fi’l-hakīka menzil-i merkūmun bazı mevâzi‘i ta‘mîr olunmuş bulunup cümleden ahırda bir büyük vurdinar direğinin başlığı ve taşı [ve] kerestesi ile beş yüz akçeye sokak kapısı dâhilinde vâki‘ bir tahta-bend odanın mecmû‘ tahtasının ve kirişlerinin ve perdesinin ve kapı ve mismârının ve üstâdiyye ve ırgadiyye ve hammaliyyesinin bin akçeye ve nerdübân ayağında vâki‘ bir yeni kenîfin kazması ve döşemesi ve etrâfının tahta perdesinin ve önünün kaldırımının sekiz yüz akçeye ve önünün dahlîzinin tahta döşemesi ve kirişi ve altında direkleri ve fevkinde oluklarının altı yüz akçeye ve sakfının akdarmasının kireçlerine ve kifâyet etmeyen kiremidlerine ve bazı pedavra tahtalarının altı yüz akçeye ve bu cümle menzil-i mezbûrun zikr olunan mevâzi‘in vech-i meşrûh üzere ta‘mîrinin cem‘an üç bin beş yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimîn ittifâk ettiklerini mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr etmeğin mâ-vaka‘a ketb olundu. Fî-evâhiri Saferi’l-hayr min-şühûri sene erba‘a ve ışrîn ve elf. Şühûdü’l-hâl: Ferhad Bey b. Cerrâh?, Ali Çavuş b. ( ), Mahmud Efendi b. ( ) el-imâm, Mahmud Ağa b. Abdullah, Hasan Bey b. ( ) el-bevvâb ve gayruhüm.