Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 216 Hüküm no: 151 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın oturduğu Haremeyn Evkafı’na ait Bostancıbaşı Aliağa mahallesindeki evde yaptığı tadilatın keşfi Haremeyn-i Şerîfeyn Evkāfı’ndan olup mahrûse-i İstanbul’da Bostancıbaşı Aliağa mahallesinde vâki‘ lede’l-ahâlî ma‘lûmü’l-hudûd olup büyût-ı müte‘addideyi müştemil olan menzilin yevmî on yedi akçe icâre-i müeccele ile müste’ciri olan işbu hâfızü’l-kitâb fahrü’l-a‘yân Mustafa Ağa b. ( ) meclis-i şer‘-i şerîfe gelip takrîr-i kelâm ani’l-merâm edip bundan akdem menzil-i mezbûrun matbahı ve sakfı ve bir tahta-pûşu ve iki ocağı ve bazı dolma duvarları ve tahta perdesi ve iki kapısı ve bir kilârı ve taşrada tahta-bendi ve ahırı ve kârîzi meremmâta ve bir saman odası müceddeden binâya muhtâc oldukda menzil-i mezbûrun icâre-i müeccelesine mahsûb olmak üzere kendi mâlımdan izn-i şer‘î ve ma‘rifet-i mütevellî ile tecdîd ve meremmât eylemişidim hâlâ kıbel-i şer‘den üzerine varılıp ne mikdâr akçeye tahammülü vardır keşf ve tahrîr olunmasın taleb ederim dedikde savb-ı şer‘den Mevlânâ Mehmed Efendi b. Süleyman el-müderris ve hâssa mi‘mârlardan üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp evkāf-ı mezbûreye bi’l-fi‘il mütevellî olan el-Hâc Hasan Bey b. Mehmed nâm bevvâb-ı sultânî mahzarında keşf olundukda fi’l-hakīka mevâzi‘-i mezbûre tecdîd ve meremmât olunmağın bu cümleye sarf olunan kereste ve kiremidin ve tuğla ve kireç ve horasaninin ve mismârının ve neccâriyye ve ırgadiyye ve hammâliyyesinin ba‘de küllî hesâb yirmi bin dokuz yüz doksan sekiz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk ettiklerini mevlânâ-yı mezbûr mahallinde tahrîr edip ba‘dehû meclis-i şer‘a gelip haber verdikde mâ-hüve’l-vâkı‘ bi’t-taleb ketb olundu. Tahrîren fî-evâili Rebî‘i’l-evvel li-sene erba‘a ve ışrîn ve elf. Şühûdü’l-hâl: Hacı İbrahim b. Mehmed, Mehmed Çavuş b. ( ), Mürsel Bey b. Hüseyin, Ali b. Karagöz, İbrahim Çavuş b. ( ), Mustafa b. Ahmed ve gayruhüm.