Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 226 Hüküm no: 164 Orijinal metin no: [55b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti Hatun bt. Hızır’ın vakfiyesi Mâ-huviye hâze’l-kitâbü’s-sahîhü’ş-şer‘î ve zâlike’l-hitâbü’s-sarîhü’l-mer‘î min-asli’l-vakfi ve’ş-şürûti ve vücûhi’l-mesârifi ale’n-nemati’l-mebsût vazaha küllühû ledeyye ve sahha cemî‘uhû beyne yedeyye ve hakemtü bi-sıhhatihî ve lüzûmihî âlimen bi’l-hılâfi’l-cârî beyne’l-eimmeti’l-eşrâf ve ene ez’afü’l-enâm Emrullah b. Mehmed el-Kassâmü’l-askerî bi-Medîneti Kostantıniyyeti’l-mahmiye -ufiye anhümâ- Elhamdülillâhi’l-vâkıf alâ-külli hâl, ve ba‘d, işbu mazmûnunda vakıf ikrârından bahseden sahîh ve şer‘î bir hüccettir. Mahmiye-i Kostantıniyye mahallâtından Alipaşa-i atîk mahallesinde sâkine Sitti Hatun bt. Hızır nâm hatun meclis-i şer‘-i şerîfe hâzıra olup şöyle ikrâr ve i‘tirâf eyledi ki, işbu vakıf ikrârının kendisinden sudûruna kadar mâliki olduğu ve taht-ı tasarrufunda bulundurduğu, mahalle-i merkūmede kâin, tahtânî iki bâb hâneyi, kenîfi, eşcâr-ı müsmireli muhavvatayı, ahırı, selamlığı hâvî, hudûdu iki tarafından şıkk-ı sânî defterdârı Mehmed Efendi b. Musa mülkü, bir tarafından Mevlânâ Mehmed Efendi mülkü, bir tarafından tarîk-ı âm ile mahdûd bulunan cemî‘ menzilini cümle tevâbi‘i ve levâhıkıyla niyet-i hâlise ve taviyet-i vâfiye üzere habsedip vakfetti. Menzil-i mezbûrda süknâyı evvelâ müddet-i hayâtıca kendisine, ba‘de vefâtihâ ahır hâriç süknâyı hâzır bi’l-meclis, ana-baba bir bir er karındaşı oğlu Hüseyin Çelebi b. Yusuf’a şart eyledi. Vefâtından sonra evlâdına, evlâd-ı evlâdına, neslen ba‘de neslin ve fer‘an gıbbe aslin ile’l-inkırâz evlâd-ı evlâd-ı evlâdına şart eyledi. Nesilleri kesildiğinde menzil-i mezbûrun âdeti üzere icâre-i mu‘tâde ile icâreye verilip hâsıl olan ücret-i kirânın meremmet için lâzım gelen mikdârın muhâfazasından sonra Medîne-i münevvere fukarâsına irsâlini şart eyledi. Sonra menzil-i mezbûru mütevellîye teslîm eyledi. O dahî tesellüm edip sâir mütevellîler evkāfta nasıl tasarruf ettilerse öyle tasarruf eyledi. Hâl bu minvâl üzere iken vâkıfe-i mezbûre vakf-ı akār İmâm-ı A‘zam Hazret-i Ebû Hanîfe-i Kûfî hazretleri yanında lâzım değildir diyerek vakfiyyetten rücû‘ edip menzil-i mezkûrun silk-i mülküne idhâlini talep ve mütevellî-yi mezkûrdan istirdâd eyledi. Mütevellî redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr, bey‘i, hibesi ve îrâsı câiz olmayacak şekilde, müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ semi‘ahû fe-innemâ ismühû ale’llezîne yübeddilûnehû inna’llâhe semî‘un alîm ve ecrü’l-vâkıf ale’l-hayyi’l-cevâdi’l-kerîm. Tahrîren fi’l-yevmi’l-hâdî ve’l-ışrîn min-Zilhicceti’l-harâm li-sene erba‘a ve ışrîn ve elf. Şühûdü’l-hâl: Ali Efendi b. Halil el-kādi, Ali Dede b. Sâfî el-müezzin, Ali Bey b. Mehmed el-yesârî, Abdurrahman b. Pîrî, el-Hâc Bâli b. Mahmud, Osman b. Pîr Mehmed, Mustafa Beşe b. Hamza er-râcil, Mehmed b. Ali el-müezzin, Halil Bey b. Mehmed el-bevvâb, Yusuf b. Hasan, el-Hâc Şa‘bân b. Hasan, Eyyüb b. Mehmed, Mehmed b. Aydın ve gayrühüm