Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 227 Hüküm no: 165 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa’nın vakfettiği Cezeri Kasımpaşa mahallesindeki evin Rıdvan Ağa b. Abdürrahim’e kiraya verildiği Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hasan Bey b. Mehmed nâm bevvâb meclis-i şer‘de düstûr-i mükerrem müşîr-i mufahham ilh. bi’l-fi‘il kāimmakām Mehmed Paşa hazretlerinin kapıcıbaşısı olan sâhibü’l-kitâb kıdvetü’l-emâcid ve’l-ekârim Rıdvan Ağa b. Abdürrahim nâm müteferrika mahzarında ikrâr-ı tâm ve takrîr-i kelâm edip mahmiyy-i merkūmede merhûm Cezerî Kasımpaşa mahallesinde sâkin iken bundan akdem vefât [eden] merhûm Ali Paşa hâl-i hayâtında ve kemâl-i sıhhatinde mahalle-i merkūmede vâki‘ dâhiliyye ve hâriciyye iki muhavvatayı muhteviye olup muhavvata-i dâhiliyyesi fevkānî altı bâb odayı ve bir kârgîr mahzeni ve bir büyük sofayı ve iki bâb sofalarını ve bir kenîfi ve tahtânî üç bâb odayı ve bir sofayı ve bir mıhtabı ve bir kârgîr mahzeni ve bir fırını ve bir matbahı ve kilârı ve bir kenîfi ve bir hamâmı ve bir su kuyusunu ve bahçeyi ve muhavvata-i hâriciyyesi fevkānî bir bâb kubbeli odayı ve tarafeyninde dört bâb fevkānî küçük odayı ve bir bâb oda ve câmekânı müştemil hamâmı ve kenîfleri ve abdesthâneyi ve sofateyni müştemil bir bâb dîvânhâne odasını mâbeyninde dahlîzi tahtında bir bâb odayı ve bir kitâbhâneyi ve birbiri mukābelesinde iki bâb fevkānî odayı ve bir büyük sofayı ve altında bir otluk anbârını ve bir sofayı ve bir küçük matbah odasını ve dahlîzi ve bir su kuyusunu ve tahtânî bir nâ-tamâm hamâmı ve bir kilârı ve külhân yerini ve bir ahır-ı kebîri ve fevkinde beş bâb odayı ve bir matbah-ı kebîri ve bir su kuyusunu harem kapısı kurbünde bir bâb fevkānî odayı ve koçi yerini ve bir mikdâr muhavvatayı ve cüneyneyi ve taşra kapı yanında bir su kuyusunu ve iki bâb tahtânî bekçi odasını ve tahtânî ve fevkānî kenîfleri ve dâhiliyye ve hâriciyyede cem‘an beş aded maslağı ve cüneyneyi müştemil olup hudûdunun bir tarafı bazen Mansur Çavuş evlâdına vakfolan menzil ve bazen merhûm müşârun-ileyh Cezerî Kasımpaşa Vakfı’na ve bir tarafı merhûme Şâhbula Hatun Vakfı’na ve bir tarafı merhûm el-Hâc Piyale Vakfı’na ve bir tarafı tarîk-i âmma müntehî ve mahdûd olan menzilini cemî‘-i tevâbi‘ ve levâhıkı ile mülkü iken evvelâ kendi nefsine ba‘de vefâtihî evlâdına ve evlâd-ı evlâdına ba‘de’l-inkırâz Medîne-i Münevvere fukarâsına vakfedip hâlâ fevt oldukda evlâdı kalmamağla ber-mûceb-i şart-ı vâkıf-ı müşârun-ileyh menzil-i merkūm fukarâ-i mezbûreye âid olmağla mahlûl olup îcârı lâzım gelmeğin ecr-i misli istiksâ ve tetebbu‘ olunmakiçin kıbel-i şer‘den hâssa mi‘mârlardan üstâd Ali b. Halil ve zeyl-i kitâbda isimleri mastûr olan Müslimîn ile menzil-i mezbûrun üzerine varılıp hakīkat-ı hâl keşf ve müşâhede olundukda fi’l-hakīka mi‘mâr-ı mezbûr ve sâir elh-i vukūf Müslimîn menzil-i merkūmun yüz yirmi bin akçe icâre-i mu‘accele ve yevmî kırk akçe icâre-i müecceleye tahammülü vardır deyu tahmîn-i sahîh ile tahmîn edip ittifâk ettiklerine binâen vech-i mezkûr üzere müşârun-ileyh Rıdvan Ağa istîcâra tâlib olmağla bir akçe ziyâde ile tâlib-i âhar zuhur etmemeğin ben dahi menzil-i merkūmu bi cümleti’t-tevâbi‘ ve levâhık târîh-i kitâbdan ber-vefk-i muharrer yüz yirmi bin akçe icâre-i mu‘accele ve yevmî kırk akçe hesâbı üzere beher şehr bin iki yüz akçe icâre-i müeccele ve mu‘accelesine mahsûb olmak üzere vakfa teberru‘an lâzım gelen ta‘mîr ve meremmetini kendi mâlıyla etmek üzere müşârun-ileyh Rıdvan Ağa’ya tevliyetim hasebi ile îcâr ve teslîm eyledim ol dahi vech-i mesfûr üzere istîcâr ve kabûl ettikden sonra icâre-i mu‘accelesi olan meblağ-ı mezbûr yüz yirmi bin fıddî Osmânî nakd râyic mine’l-vakt akçeyi [56b] nakd fıddî Osmânî akçeyi müşârun-ileyh Rıdvan Ağa <> yedinden vakfi’çün bi’t-tamâm alıp kabz edip mazmûn-ı mezkûr üzere yedine hat ve hatemimi müştemil temessük dahi verdim. Ba‘de’l-yevm icâre-i müeccele-i mezbûresi mâh be-mâh cânib-i evkāf-ı mezbûreye edâ eyleye hâricden kimesne tasarrufuna mâni‘ olmayıp keyfe mâ yeşâ sâir emsâli gibi mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb kebt olundu. Fî-evâili Muharremi’l-harâm min-şühûri sene hamse ve ışrîn ve elf mine’l-hicreti’n-nebeviyye. Şühûdü’l-hâl: Süleyman Ağa b. ( ) Kethüdâ-i kāimmakām-ı mûmâ-ileyh, Osman Ağa b. ( ) ser-kuyu[m]cuyan? Mehmed Ağa b. ( ) Tophanevî, Mehmed Ağa b. ( ) ser-kilârî, Hüseyin Ağa b. ( ) Kethüdâ-i bevvâbân-ı dergâh-ı âlî, Hasan Çavuş b. Selami, Esved Receb Bey b. ( ) el-cündî, Üveys Çavuş b. ( ) Dergâh-ı âlî, Ömer Çavuş b. ( ) Dergâh-ı âlî, Ali Çavuş b. ( ) Mi‘mârî, Ahmed Efendi b. ( ) Tezkire-i evvel, Yusuf Ağa b. ( ) Mirâhor, Kadri Çelebi b. ( ) Tezkire-i sânî, Kenan Efendi b. ( ) el-kâtib, diğer Receb Bey b. ( ) el-cündî, Sinan Ağa b. ( ) Müteferrika, Hasan Ağa b. ( ) ez-zevvâk, Bayezid Bey b. ( ) el-cündî, Halil Bey b. ( ) el-cündî, Mehmed Çelebi b. ( ) el-kâtib, İbrahim Çelebi b. ( ) el-bevvâb, Ferhad Bey b. ( ) el-câbî, Abdürrahim Çelebi b. Hasan, Süleyman Ağa b. ( ) ez-zevvâk, Mustafa Efendi b. ( ) el-Kâtib ve gayruhüm mine’l-hâzırîn.