Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 230 Hüküm no: 167 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid Câmii civarındaki Haremeyn Evkafı’na ait hamamın Mustafa b. Abdülgani’ye bir yıllığına kiraya verilmesi Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘de râfi‘ü’l-kitâb Mustafa b. Abdülgani mahzarında ikrâr-ı tâm ve takrîr-i kelâm edip evkāf-ı mezbûreden olup mahmiye-i mezbûrede merhûm Sultân Bayezid Hân -aleyhi’r-rahme ve’l-gufrân- Câmi‘-i şerîfi kurbünde vâki‘ evkāf-ı mezbûreye intimâ ile tahdîd ve ta‘rîfden mustağnî ferd hamâmın müddet-i icâresi tamâm olup tekrâr îcârı lâzım gelmeğle tâlibîne arz olundukda ragabât-ı nâs munkatı‘a oldukdan sonra mezbûr Mustafa üzerinde bir seneye yedi bin akçede karâr edip bir akçe ziyâde ile tâlib-i âhar zuhûr etmeyip mezbûr Mustafa meblağ-ı ma‘lûmü’l-mikdâr ile istîcâra râgıb olmağın ben dahi tevliyetim hasebi ile hamâm-ı mezbûru târîh-i kitâbdan bir sene tamâmına değin mâh be-mâh kıstü’l-yevmini cânib-i evkāf-ı mezbûreye edâ ve teslîm etmek üzere yedi bin fıddî Osmânî râyicü’l-vakt akçeye mezbûr Mustafa’ya îcâr eyledim ol dahi vech-i muharrer üzere istîcâr ve kabûl eyledikden sonra mütevellî-i mezbûru ikrâr-ı meşrûhunda müste’cir-i merkūm dahi vicâhen tasdîk ve şifâhen tahkīk ettikden sonra işbu hâzır bi’l-meclis olan Ali Bey b. Yusuf nâm kimesne meblağ-ı mezbûra emr ve kabûlü hâviye kefâletle kefîl olmağın mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâlis min-şehri Saferi’l-hayr li-sene hamse ve ışrîn ve elf. Şühûdü’l-hâl: İshak Efendi b. ( ) Mütevellî-i Ayasofya-i kebîr, Eyüb b. Ali el-bevvâbü’s-sultânî, Ali Çelebi b. Halil el-mi‘mârü’l-hâs, Mustafa Çelebi el-Kâtib.