Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 230 Hüküm no: 168 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait üç aded dükkanın mutasarrıfı Ebubekir b. Ali’nin yaptığı tadilatın keşfi Mahmiye-i İstanbul’da Vefâ Meydânı kurbünde vâki‘ Haremeyn-i Şerîfeyn Evkâfı’ndan icâre-i mu‘accele ve müeccele ile fevkānî ve tahtânî bir birine muttasıl üç bâb dükkâna mutasarrıf olan râfi‘ü’l-kitâb Eyüb Bey b. Ali nâm bevvâbü’s-sultânî meclis-i şer‘-i şerîfe gelip takrîr-i kelâm edip zikr olunan dükkânlar müşrif ile’l-harâb ve mâil-i türâb olup müceddeden ta‘mîri lâzım olmağın bundan akdem izn-i şer‘î ve ma‘rifet-i mütevellî ile harcım icâre-i mu‘acceleme mahsûb olmak üzere kendi mâlım ile müceddeden ta‘mîr ve termîm eyledim hâlâ cânib-i şer‘-i şerîfden üzerine varılıp zikr olunan binânın ne mikdâra tahammülü olduğu ba‘de’l-keşf ve’l-mesâha tahmîn ve ta‘yîn ve mahallinde tahrîr ve tebyîn olunması matlûbumdur dedikde cânib-i şer‘-i mutahhardan Mevlânâ Mehmed Efendi irsâl olundu hâssa mi‘mârlardan üstâd Ali b. Halil ve zeyl-i kitâbda isimleri mastûrü’l-esâmî bî-garaz Müslimîn ile üzerine varıp keşf ve mesâha olundukda bennâ zirâ‘ı ile tûlen on altı ve arzen sekiz zirâ‘ ki bi-hesâb-ı şatrancî yüz yirmi sekiz zirâ‘ önlerinin ve yanlarının tahta perdeleri ve yine tûlen on altı ve arzen on zirâ‘ ki bi-hesâb-ı şatrancî yüz altmış zirâ‘ sakfı ve yine tûlen on altı ve arzen sekiz zirâ‘ ki bi-hesâb-ı şatrancî yüz yirmi sekiz zirâ‘ tahta döşemeleri ve bölmeleri ve üç aded ocakları müceddeden ta‘mîr olunmuş bulunup bu cümlenin tahtaları ve kirişleri ve direkleri ve pedevraları ve kiremidleri ve maslak tabanları ve tuğlaları ve kireçleri ve mismâriyye ve hammâliyye ve ırgadiyye ve üstâdiyyesi nakzından mâ‘adâ on beş bin akçeye mütehammildir noksân ile olmak emr-i muhâldir deyu ittifâken tahmîn-i sahîh ile tahmîn ettiklerinde mevlânâ-yı mezbûr mahallinde tahrîr ve gelip vâki‘ hâli meclis-i şer‘de beyân ve takrîr etmeğin mâ-hüve’l-vâkı‘ bi’t-taleb ketb olundu. Fi’t-târîhi’l-mezbûr. Şühûdü’l-hâl: Davud Bey b. Mehmed, Ferhad Bey b. Abdullah el-bevvâb, Murad Beşe b. ( ), er-râcil, Yahya b. Ali, Nazar b. Receb ve gayruhüm.