Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 235 Hüküm no: 173 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Bey b. Abdülvahhab’ın Haremeyn Evkafı’na ait Cerrahbaşı mahallesinde kiraladığı ev için temessük verildiği İşbu râfi‘ü’l-kitâb Hüsrev Bey b. Abdülvahhab nâm kimesne meclis-i şer‘-i şerîfe gelip takrîr-i kelâm edip mahmiye-i İstanbul’da Cerrâhbaşı mahallesinde vâki‘ iki tarafı merhûm Kürkçübaşı Süleyman Ağa Vakfı ve bir tarafı Medîne-i Münevvere Vakfı ve bir tarafı tarîk-i hâs ile mahdûd olup iki bâb fevkānî ve bir bâb tahtânî evleri ve bir ahırı ve bi’r-i mâyı ve cüneyneyi ve kenîfi ve muhavvatayı müştemil olan menzil Evkāf-ı Haremeyn-i Şerîfeyne âid olmağın hâlâ evkāf-ı mezbûre mütevellîsi el-Hâc Hasan Bey b. Mehmed nâm bevvâb-ı sultânî menzil-i mezkûru cemî‘ tevâbi‘ ve levâhıkı ile ihdâs ettiğim binâ vakfın olup harcım icâre-i mu‘acceleme mahsûb olmak üzere beş bin akçe icâre-i mu‘accele ve yevmî üç akçe icâre-i müeccele ile bana îcâr edip ben dahi vech-i meşrûh üzere istîcâr ve kabûl eylediğimden sonra meblağ-ı mezbûr beş bin akçeyi vakf için yedimden bi’t-tamâm ahz u kabz edip menzil-i mezbûru zabt ve tasarrufa izin vermişdir deyu mütevellî-i mezbûrun imzâsıyla mümzâ ve hatemi ile mahtûme ve bin on sekiz senesi Recebi’nin evâili ile müverraha mazmûnu takrîrine muvâfık tezkire ibrâz edip ber-mûceb-i tezkire-i merkūme cânib-i şerîfden dahi temessük taleb etmeğin işbu hurûf ber-sebeb-i temessük ketb olundu. Tahrîren fî-evâili şehri Rebî‘i’l-evvel sene hamse ve ışrîn ve elf. Şühûdü’l-hâl: Çâker Çavuş b. Abdullah, el-Hâc Ahmed Bey b. ( ) el-cündî, Mehmed Halîfe b. ( ) el-imâm, Yusuf Beşe b. ( ) er-râcil, Faik Bey b. ( ) el-cündî, Ali Efendi el-imâm, Mustafa Beşe b. ( ) er-râcil.