Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 236 Hüküm no: 174 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Ali Bey’in Eyüp’de Ahmed Dede mahallesindeki evini Haremeyn Evkafı’na vakfettiği Mesbûkün alâ-kālibi’l-asli’l-mahfûz nemekahu’l-fakīr Ya‘kub b. Mehmed el-müvellâ hilâfeten bi-mahkemeti Davud Paşa bi-medîneti Kostantıniyyeti’l-mahmiye -ufiye-anhümâ- Fî zımnihî mâ-yu‘teberu inde’s-subûti’l-mu‘teber ketebehu Mehmed b. Sadeddin el-fakīr -ufiye-anhümâ- Hamd-i bî-pâyân ol mâlikü’l-mülk-i câvidân ve vâkıf-ı esrâr-ı ins ü cân hazretlerinin bârgâh-ı mukaddeslerine ref‘ olunup dürer-i salât u selâm huceste-nizâm şâh-ı rüsül maksad-ı aksâ-yı küll Muhammed Mustafa aleyhi’s-salâtü fî-külli subh u mesâ hazretlerinin ravza-i raziyye ve hazîre-i hatîrlerine ve ol ashâb-ı izzet-i intisâblarının ervâh-ı tayyibe-i tâhirelerine îsâr oldukdan sonra bu sahîfe-i sahîha-i şer‘iyye me‘âlî tahrîrine bâ‘is ve bâdî budur ki, Dârü’s-saltanati’s-seniyye Kostantıniyye el-mahmiye mahallâtından Hatib Muhyiddin mahallesinde sâkin sâhibü’l-hayrât ve râgıbü’l-meberrât fahrü erbâbi’t-tahrîr ve’l-kalem Hüseyin <> Efendi b. el-merhûm Ali Bey vaktâ ki bu dünyâ mezra‘a-i âhiret olup bundan gayrı bir cihet-i fâhire olmadığı bildi ise kemâl-i sıhhat ve âfiyeti hâlinde meclis-i şer‘de ikrâr u i‘tirâf edip Hazret-i Ebî Eyyûb el-Ensârî aleyhi’r-rahmeti’l-meliki’l-Bârî’de Ahmed Dede mahallesinde vâki‘ üç beyt-i süflîyi ve bir köşkü ve bir havuzu ve iki su kuyusunu ve iki mâ’-i cârîyi ve bir ahırı ve bir at değirmenini ve eşcâr-ı müsmire ve gayr-ı müsmireyi muhtevî bir kıt‘a bağı ve kenîfi ve hadîkayı müştemil olup bir tarafı kız karındaşım Fâtıma Hatun bt. Ali mülkü ve bir tarafı merhûm Mahmud Paşa Vakfı ve iki tarafı tarîk-i âm ile mahdûd olan mülk menzilimi cemî‘-i tevâbi‘ ve levâhıkı ile hasbeten lillâhi te‘âlâ ve haseneten li rûhi seyyidi’l-enbiyâ vakf-ı sahîh-i şer‘î ve habs-i sarîh-i mer‘î edip menzil-i mezbûrun tasarrufunu evvelâ kendi nefs-i nefîseme şart eyledim mâdâm ki kayd-ı hayâtda olam <> vefâtımdan sonra evlâd-ı evlâdıma ve evlâd-ı evlâd-ı evlâdıma şart eyledim ba‘de’l-inkırâz kız karındaşım mezbûre Fâtıma Hatun’a ba‘de vefâtihâ evlâdına ve evlâd-ı evlâdına ve evlâd-ı evlâd-ı evlâdına şart eyledim ba‘de’l-inkırâz Medîne-i Münevvere fukarâsına şart eyledim ve tevliyetini kendime şart eyledim vefâtımdan sonra re’y-i hâkime müveffaz kıldım ki her kim mahal olursa onu mütevellî nasb ve ta‘yîn eyleye ve meremmât lâzım geldikde her kim içinde sâkin olursa ol ta‘mîr eyleye ve nezâretini her kim Dârü’s-saltanati’s-seniyye’de <> kızlar ağası olursa ona şart eyledim ve zikr olunan menzil-i mezbûrun tasarrufunu Medîne-i Münevvere fukarâsına tevcîh ettiğinde mütevellîsi olan kimesne nâzır-ı mezbûr ma‘rifeti ile alâ-hasbe’l-âde icâre-i şer‘iyye ile [59b] icâreye verip her sene hâsıl olan icâresinden yevmî ikişer akçesin mütevellî kabz edip ve bir akçesin mütevellî-i mezbûr nâzır-ı mesfûra teslîm edip bâkī kalan icâreyi ba‘de’t-ta‘mîr Medîne-i Münevvere fukarâsına irsâl ve îsâl eyleye deyip ve menzil-i mezkûru li ecli’t-tescîl mütevellî nasb eylediğim işbu hâzır fi’l-meclis olan Sipâhî Osman Bey b. Abdullah nâm kimesneye ba‘de’t-tahliyye teslîm edip ol dahi kabz ve tesellüm edip menzil-i mezbûru mütevellîler sâir evkāfda tasarruf ettikleri gibi tasarruf eyledi dedikde ba‘de’t-tasdîk vâkıf-ı mezbûr takrîr-i kelâm edip vakf-ı akār muktedâ-yı kibâr olan İmâm-ı A‘zam ve hümâm-ı akdem Ebî Hanîfe Numan b. Sâbit el-Kûfî -cûziye hayrü’l-cezâ ve’l-kûfiye- mezheb-i şerîfi üzere gayr-ı lâzım olmağın vakf-ı mezbûrdan rücû‘ murâd edip silk-i mülküne istirdâd eyledikde mütevellî-i mezbûr dahi “el-vakfu izâ sahha lezime” diyen hıyâr-ı eimme-i Hanefiyye kavilleri ile ihticâc edinip red ve teslîmden imtinâ‘-birle husûmet edicek vâkıf-ı mezbûr mütevellî-i merkūm ile muvakki‘ü’l-kitâb olan hâkim-i hâsim huzûruna müterâfi‘ân ve husûs-ı kaziyyede fasl-ı hasma tâlibân olduklarında hâkim-i müşârun-ileyh dahi cânib-i vakfı evlâ görmeğin âlimen bi’l-hilâf vakf-ı mezbûrun lüzûmuna alâ-re’yi men yerâhu mine’l-eimmeti’l-müctehidîn hükm-i şer‘î ve kazâ-i mer‘î edicek menzil-i mezbûr vakf-ı lâzım-ı müseccel oldu. “Fe-men beddelehû ba‘demâ semi‘ahû” ilh. cerâ zâlike ve hurrire 12 min-Recebi’l-mürecceb sene semân ve aşere ve elf. Şühûdü’l-hâl: Fahrü’s-sâlikîn eş-Şeyh Mehmed Efendi, Mehmed Efendi, Ahmed Efendi b. Mehmed, el-Hâc Fethullah el-müezzin, Mustafa b. Mehmed, Halil b. Ali, Hüsam Efendi b. ( ) el-kādî, Mehmed Efendi b. ( ) el-kâtib, Rıdvan b. Abdullah, Hüseyin b. Ali, Mahmud b. Ahmed, Hüseyin b. Abdullah, Ahmed b. Davud, Mahmud b. Ahmed, Hasan b. Musa.