Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 237 Hüküm no: 175 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Şahkulu mahallesindeki evin Fahri Hatun bt. Abdullah tarafından kiralandığı Mahrûse-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hasan Bey b. Mehmed nâm bevvâb-ı sultânî meclis-i şer‘de işbu hâmilü’l-kitâb Fahri Hatun bt. Abdullah mahzarında ikrâr-ı tâm ve takrîr-i kelâm edip mahmiye-i Galata hısn-ı ebvâbından kule kapısı hâricinde Şahkulu mahallesinde sâkine iken bundan akdem fevt olan Fâtıma Hatun bt. Abdullah hâl-i hayâtında ve kemâl-i sıhhatinde mahalle-i merkūmda vâki‘ bir tarafı Rahime Hatun bt. Nasuh Reis mülkü ve bir tarafı Hayrioğlu evi demekle ma‘rûf menzil ve tarafeyni tarîk-i âm ve hâs ile mahdûd ve hesâb-ı şatrancî üzere altı yüz altmış altı zirâ‘ arsa üzerine mebnî olup tahtânî üç bâb odayı ve bir köhne kilârı ve bir çardağı ve bi’r-i mâyı ve kenîfi ve eşcâr-ı müsmire ve gayr-ı müsmireyi [ve] muhavvatayı müştemil olan menzili mülkü iken evvelâ kendi nefsine ba‘dehâ atîkası Kahraman’a ve evlâdına ve evlâd-ı evlâdına ve ba‘de’l-inkırâz Medîne-i Münevvere fukarâsına vakfetmişidi. Hâlâ merkūme Kahraman ve evlâdı münkariz olup ber-mûceb-i şart-ı vâkıfe-i müşârun-ileyhâ menzil-i merkūm fukarâ-i mezbûreye âid olmağla îcârı lâzım geldikde tâlibine arz olunup ragabât-ı nâs münkatı‘a oldukdan sonra on dört bin dört yüz akçe icâre-i mu‘accele ve beher şehr kırk akçe icâre-i müeccele ile merkūme Fahri’nin üzerinde karâr edip ziyâde ile tâlib-i âhar zuhûr etmemeğin ben dahi menzil-i merkūmu lâzım gelen ta‘mîr ve meremmetin vakfa teberru‘an kendi mâlından etmek üzere târîh-i kitâbdan on dört bin dört yüz akçe icâre-i mu‘accele ve beher şehr kırk akçe icâre-i müeccele ile îcâr ve teslîm eyledim ol dahi vech-i mesfûr üzere istîcâr ve kabûl eyledikden sonra icâre-i muaccelesi olan meblağ-ı mezbûr on dört bin dört yüz akçeyi merkūme Fahri yedinden bi’t-tamâm vakf için alıp kabz eyledim ve menzil-i merkūmun içinde kendi mâlından mu‘accelesine mahsûb olmak üzere binâ ihdâs etmeğe izin verdim ba‘de’l-yevm icâre-i müeccele-i mezbûresini cânib-i evkāf-ı mezbûreye bi’l-vakt edâ edip sâir emsâli gibi mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-evâili Rebî‘i’l-evvel min-şühûri sene hamse ve ışrîn ve elf. Şühûdü’l-hâl: Ali Çelebi b. ( ) Mi‘mâr, Muslu Reis b. Nasuh, Molla Kasım b. ( ) el-imâm, Mehmed Çelebi b. ( ) el-müezzin, Ahmed Çavuş b. Muslu, Muslu Çelebi b. Kasım ve gayruhüm.