Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 238 Hüküm no: 176 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Nuri Dede mahallesindeki evin Mehmed b. Abdullah tarafından kiralandığı Mütevellî-i merkūm meclis-i şer‘de hâssa aşçılarından işbu hâmilü’l-kitâb üstâd Mehmed b. Abdullah nâm kimesne mahzarında ikrâr-ı tâm ve takrîr-i kelâm edip evkāf-ı mezbûreden mahmiye-i merkūmda Molla Gürânî kurbünde Nuri Dede mahallesinde vâki‘ iki bâb fevkānî odayı ve iki sofayı ve altında ahırı ve matbahı ve kenîfi ve su kuyusunu ve tahta-pûşu ve bahçeyi müştemil olup hudûdunun bir tarafı tarîk-i âm ve hâs ve bir tarafı Kara Bey Mehmed Bey’e meşrût olan menzil ve bir tarafı Taşcı odaları ve bir tarafı Mustafa Çelebi b. ( ) mülkü ile mahdûd olan menzili târîh-i kitâbdan yevmî dört akçe icâre-i müeccele ve on iki bin akçe icâre-i mu‘accele ile müşârun-ileyh Mehmed’e tevliyetim hasebi ile îcâr ve teslîm eyledim ol dahi vech-i meşrûh üzere istîcâr ve kabûl eyledikden sonra icâre-i mu‘accelesi olan meblağ-ı mezbûr on iki bin fıddî Osmânî nakd râyic fi’l-vakt akçeyi yedinden alıp kabz eyledim ve lâzım gelen meremmât-ı cüz’iyye ve külliyyesini dahi vakfa teberru‘an kendi mâlından edip mu‘accelesine mahsûb olmak üzere binâ ihdâs etmeğe izin verdim min-ba‘d menzil-i merkūmun ta‘mîr ve meremmetine ve binâsına her ne mikdâr akçe harc ederse ba‘dehû icâre-i muaccelesine mahsûb ola ve ba‘de’l-yevm icâre-i müeccele-i mezbûresini mâh be-mâh cânib-i vakfa edâ edip keyfe mâ yeşâ sâir emsâli gibi mutasarrıf olup hâricden kimesne tasarrufuna mâni‘ olmaya dedikde gıbbe’t-tasdîk mâ-vaka‘a ketb olundu. Fî-evâili Saferi’l-hayr li-sene hamse ve ışrîn ve elf. Şühûdü’l-hâl: Mustafa b. Burhan, İbrahim Çelebi b. Mustafa, İbrahim b. Mehmed, Mehmed Bey b. Hüseyin, Mehmed Çelebi b. Abdurrahman, Mustafa b. Abdurrahman, Memi b. ( ) el-müezzin, Ferhad Bey b. ( ) el-câbî, Ali Çelebi b. ( ) Mi‘mâr, Hüseyin Çelebi b. Ömer, Hızır b. Abdullah ve gayruhüm.