Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 240 Hüküm no: 178 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakfa ait bir evin Ahmed b. Abdi tarafından kiralanması Mütevellî-i merkūm meclis-i şer‘de sâhibü hâze’l-kitâb Ahmed b. Abdi nâm kimesne mahzarında ikrâr-ı tâm ve takrîr-i kelâm edip menzil-i merkūm fukarâ-i mezbûreye âid olup îcârı lâzım geldikde tâlibîne arz olunup ragabât-ı nâs münkatı‘a oldukdan sonra merkūm Ahmed’in üzerinde yirmi bin beş yüz akçe icâre-i mu‘accele ve beher şehr doksan akçe icâre-i müeccele ile karâr edip ziyâde ile tâlib-i âhar zuhûr etmemeğin ben dahi târîh-i kitâbdan menzil-i merkūmu merkūm Ahmed’e tevliyetim hasebi ile vech-i meşrûh üzere yirmi bin beş yüz akçe icâre-i mu‘accele ve beher şehr doksan akçe icâre-i müeccele ile lâzım gelen ta‘mîr ve termîmini teberru‘an kendi mâlımla etmek üzere îcâr ve teslîm eyledim ol dahi vech-i mesfûr üzere istîcâr ve kabûl ettikden sonra icâre-i mu‘accelesi olan meblağ-ı mezbûr yirmi bin beş yüz akçeyi yedinden vakıf için bi’t-tamâm alıp kabz eyledim ve menzil-i merkūmun içinde kendi mâlıyla mu‘accelesinde mahsûb olmak üzere binâya dahi izin verdim min-ba‘d her ne mikdâr akçe harc ederse mu‘accelesine mahsûb ola ba‘de’l-yevm icâre-i müeccele-i mezbûresin mâh be-mâh cânib-i vakfa edâ edip sâir emsâli gibi mutassarıf olsun dedikde <> gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’t-târîhi’l-mezbûr. Şühûdü’l-hâl: es-Sâbıkūn.