Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 241 Hüküm no: 179 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâni Hatun bt. Hasan Ağa’nın ölümünden sonra geliri Haremeyn Evkafı’na vakfettiği evi satın aldığını iddia eden el-Hac Mehmed b. Muharrem’in iddiasının asılsız olduğu Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan el-Hâc Hasan Bey b. Mehmed nâm bevvâb-ı sultânî meclis-i şer‘-i kavîmde menzil-i âti’l-beyâna mülkiyyet zu‘mu ile vâzı‘ü’l-yed idiği nehc-i şer‘î üzere sâbit olan el-Hâc Mehmed b. Muharrem nâm kimesne mahzarında üzerine tasvîr-i da‘vâ edip mahmiye-i merkūmede Dîvâne Ali Bey mahallesinde vâki‘ bir tarafı Serrâc Hasan Çelebi b. ( ) binâ ettiği mu‘allimhâne ve bir tarafı el-Hâc Yusuf b. Abdullah mülküne ve iki tarafı tarîk-i âmma müntehî olup bennâ zirâ‘ıyla tûlen otuz dokuz ve arzen yirmi bi-hesâb-ı şatrancî yedi yüz seksen zirâ‘ arsa üzere mebnî tahtânî iki ve fevkānî üç bâb odayı ve bir sofayı ve iki dahlîzi ve bir ahırı ve kenîfi ve cüneyneyi ve bir mikdâr muhavvatayı muhtevî olan menzili bundan akdem merhûme Hânî Hatun bt. Hasan Ağa hâl-i hayâtında ve kemâl-i sıhhatinde mülkü iken vakf-ı sahîh edip süknâsını evvelen kendi nefsine ve ba‘dehâ îcâr olunup hâsıl olan ücreti Medîne-i Münevvere fukarâsına irsâl oluna deyu şart ve ta‘yîn etmişidi. Hâlâ merkūme Hânî Hatun vefât etmekle ber-mûceb-i şart-ı vâkıfe-i mûmâ-ileyhâ îcâr olunup ücreti fukarâ-i Medîne’ye irsâl olunmak lâzım iken mezbûr el-Hâc Mehmed menzil-i merkūmu bi-gayrı vech-i şer‘î vaz‘-ı yed edip tasarruf eder, şer‘le yedi kasr ve izâle olunup tevliyetim hasebi ile vakf-ı mezbûr için zabt olunmasın taleb ederim suâl olunsun dedikde gıbbe’s-suâl mezbûr el-Hâc Mehmed cevâbında zikr olunan menzili bundan akdem el-Hâc Ali b. Abdullah nâm yesârî mülkümdür deyu bana kırk bin akçeye bey‘ ve teslîm edip ben dahi semen-i mezbûr ile iştirâ ve kabûl edip teslîm-i semen-i merkūm ve kabz-ı mebî‘-i mersûm eylemişidim. Hâlâ menzil-i merkūm mülk-i müşterâmdır vech-i meşrûh üzere vakfolduğu ma‘lûmum değildir deyu inkâr edicek mütevellî-i merkūmdan müdde‘âsını mübeyyin beyyine taleb olundukda mahalle-i mezbûre sâkinlerinden olup udûl-i Müslimînden Ahmed Çelebi b. Ali el-bevvâb-ı sultânî ve Mehmed Çelebi b. Mustafa el-cündî ve İbrahim Efendi b. Ali el-imâm ve Hüseyin Çelebi b. Yusuf el-hâfız ve Ahmed Efendi b. Mustafa el-imâm ve es-Seyyid Halil b. es-Seyyid Tahir ve Hamza b. Derviş ve İbrahim b. Abdullah nâm kimesneler meclis-i şer‘a li-ecli’ş-şehâde hâzırûn olup gıbbe’l-istişhâd fi’l-hakīka menzil-i mezbûr merkūme Hânî Hatun’un vech-i meşrûh üzere vakfı olduğu tesâmu‘-ı şer‘î ile ma‘lûmumuz olmağın menzil-i merkūmun merkūme Hânî’nin ber-vech-i muharrer vakf-ı lâzım ile vakfı idiğine şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl şehâdetleri makbûle olmağın mûcebiyle menzil-i merkūmun vakfiyyetine hükmolundukdan sonra mezbûr el-Hâc Mehmed’in [61a] ref‘-i yedine tenbîh olunup mâ-hüve’l-vâkı‘ isre’t-taleb sebt olundu. Fî-evâili şehri Ramazâni’l-mübârek min-şühûri sene erba‘a ve ışrîn ve elf min-hicreti’n-nebeviyye. Şühûdü’l-hâl: Ferhad Bey b. ( ) el-Câbî, Ali Çelebi b. Halil el-Mi‘mârü’l-hâs, İbrahim Bey b. ( ) el-Bevvâb, Mustafa Bey b. ( ) el-Bevvâb, Hüseyin Çelebi b. Ömer el-Câbî, Ali Beşe b. ( ) er-râcil ve gayruhüm.