Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 291 Hüküm no: 248 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Anastaş’ın alacak iddiasının meşru olmadığı Ma‘rûz, Sebzeci tâifesinden arzuhâl eden Yani v. Anastaş nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde sâbıkā Kapudan-ı deryâ Ahmed Paşa’nın hazînedârı derûn-ı arzuhâlde mezkûrü’l-ism el-Hâc İbrahim Bey b. Ahmed muvâcehesinde mezbûr el-Hâc İbrahim Bey bin iki yüz elli üç senesi hilâlinde Paşa-yı mûmâ-ileyhin medîne-i Üsküdar’da Paşalimanı’nda vâki‘ sâhilhânelerinde mukīmler olan Süvârî asâkirinin me’kûlâtı için ne mikdâr sebze iktizâ ederse asâkir-i merkūmenin vekîlharçları olunan gāib ani’l-meclis Ahmed Ağa’ya sen bey‘ eyle deyü bana emir etmekle ben dahi malımdan asâkir-i merkūmenin me’kûlâtı için gāib-i mezbûr Ahmed Ağa’ya bey‘ ü teslîm eylediğim ma‘lûmü’l-vezn ve’l-fiyat sebzenin ba‘de külli’l-hesâb cem‘an esmânı olup ol vechile benim gāib-i merkūm zimmetinde alacağım olan üç bin yüz yirmi üç guruşun dört yüz guruşunu mukaddemâ gāib-i mezbûr Ahmed Ağa’dan kabz ü istîfâ etmiş idim. Lâkin el-hâletü hâzihî ben bâkīsi olan iki bin yedi yüz yirmi üç guruşu gāib-i merkūm Ahmed Ağa’dan ahzedemediğime ve mücerred merkūm İbrahim Bey asâkir-i merkūmenin me’kûlâtları için ne mikdâr sebze iktizâ eder ise sen gāib-i merkūma bey‘ et deyü bana emr eylediğine binâen meblağ-ı bâkī-i mezbûr iki bin yedi yüz yirmi üç guruşu merkūm el-Hâc İbrahim Bey’in bana malından edâ eylesin deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm Yani zimmîye tefhîm ve da‘vâ-yı mezkûresiyle merkūm el-Hâc İbrahim Bey’e bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 10 C sene [12]57.