Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 291 Hüküm no: 249 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mehmed ve sairlerinin Bogos’ta olan alacaklarını tecil etmeleri Ma‘rûz, Medîne-i Üsküdar’da mütemekkin attâr esnâfından arzuhâl eden Bogos v. Aref nâm zimmînin ber-vech-i âtî dâyinlerinden olup derûn-ı arzuhâlde isimleri mezkûr cihet-i karzdan üç bin guruş iddi‘â eden Süleyman Bey b. Mehmed ve meshûk kahve semeninden dört yüz yetmiş sekiz guruş iddi‘â eden es-Seyyid Mustafa Ağa b. Osman nâm kimesneler ile cihet-i karzdan iki bin beş yüz guruş iddi‘â eden Kuyumcu Karabet v. İknar ve kezâlik cihet-i karzdan bin guruş iddi‘â eden Aci Gapril v. Artin ve yine cihet-i karzdan dokuz yüz guruş iddi‘â eden Derzi Artin v. Bağdisar ve def‘a cihet-i karzdan üç yüz altmış beş guruş iddi‘â eden Kuyumcu Karabet v. Agob ve semen-i mebî‘den dört yüz yetmiş guruş iddi‘â eden Fincancı Bedros v. Kerupa ve kezâlik semen-i mebî‘den üç yüz guruş iddi‘â eden Avanis v. Kigork ve yine semen-i mebî‘den altı yüz otuz guruş iddi‘â eden Kirhor v. Abraham zimmîler ve cihet-i deyn-i şer‘îden dört yüz yirmi yedi guruş iddi‘â eden Davit v. Mosi nâm Yahûdi’den her biri Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde medyûn-ı mersûm Bogos zimmî muvâcehesinde bizim mersûm Bogos zimmetinde li-ebeveyn er karındaşı işbu hâzır bi’l-meclis Mıgırdıç zimmî kefâletiyle min-haysü’l-mecmû‘ on bin yetmiş guruş alacak hakkımız olup lâkin meblağ-ı mecmû‘-ı mezkûru mersûm Bogos zimmînin hâlâ bize edâya bir vechile iktidârı olmayıp ber-vech-i âtî istimhâl eylediğinde biz dahi meblağ-ı mecmû‘-ı mezkûr on bin yetmiş guruşu işbu târîh-i i‘lâmdan iki sene mürûrundan sonra tamâmen bize edâ ve îfâ etmek üzere rızâlarımızla medyûnumuz mersûm Bogos zimmîyi imhâl ve te’cîl ve te’hîr eyledik deyü mukırrûn-ı mezbûrûnun bi’l-cümle takrîr-i meşrûhlarını mersûm Bogos zimmî tasdîk ve deyn-i meblağ-ı mecmû‘-ı mezkûru ikrâr ü i‘tirâf ve ber-minvâl-i muharrer müeccelen ve muahharan dâyinleri merkūmûna edâya ta‘ahhüd eylediği huzûr-ı [âlîlerine i‘lâm olundu]. Fî 27 Ca sene [12]57.