Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 245 Hüküm no: 185 Orijinal metin no: [62a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Rıdvan’ın bey‘ bi’l-istiğlâl yoluyla Haremeyn Vakfı’ndan ödünç aldığı Âişe Hatun bt. Rıdvan nâm hatun meclis-i şer‘-i şerîfe gelip işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahmiye-i medîne-i Kostantıniyye mahallâtından Şeyh Muhyiddin Kocavî mahallesinde kâin, bir tarafından Mehmed b. Mahluf mülkü, bir tarafından Sâime Hatun bt. Memi Reis mülkü, bir tarafından vakıf, bir tarafından da tarîk-ı âm ile mahdûd bulunan menzilini cümle tevâbi‘ ve levâhıkıyla râyicü’l-vakt yirmi bin akçe-i Osmanî semen-i mu‘ayyen-i makbûzla Haremeyn-i Şerîfeyn Vakfı’na mütevellî olan hâmil-i hâze’l-kitâb Ahmed Bey b. Kemal’e bey‘ ettiğini ikrâr ve i‘tirâf eyledi. Mütevellî-i mezbûr dahî mâl-ı vakf ile ve istiğlâl maksadıyla iştirâ eyledi. Bâyi‘-i mezkûrun isti’cârı üzere mütevellî-i merkūm, menzil-i mezbûru tarih-i kitâbdan bir sene tamâmına üç bin akçe ücret-i kirâ ile îcâr eyledi. Mezbûre Âişe sonra meblağ-ı mezbûr mukābelesinde kırk beş miskāl altını mütevellî-i mezkûra rehin verdi. O dahi vech-i mesfûr üzere rehin aldı. Vâki‘ ikrâr mütevellî-i mezkûr tarafından vicâhen ve şifâhen tasdîk edildi. Cerâ zâlike ve hurrire fi’l-yevmi’s-sâmin min-Cemâziyelâhire li-sene hamse ve ışrîn ve elf. Şühûdü’l-hâl: Hüseyin Bey b. Mahmud el-cündî, Muslu Çelebi b. el-Hâc Kasım, Receb Bey b. Abdullah el-bevvâb, Muharrirü’l-hurûf Mehmed Efendi ve gayrühüm