Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 246 Hüküm no: 186 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihriban Sultan bt. [Şehzade]? Bayezid Han’ın ev vakfı Mâ-hüve’l-muharrerü fîhî mine’l-vakfi ve şerâitihi ve’l-habsi ve zavâbitihi sahha ledeyye ve sebbete beyne yedeyye hakemtü bi-sıhhatihî ve lüzûmihî fî-husûsihî ve umûmihî âlimen bi-hilâfi’l-cârî beyne’l-eimmeti’l-eslâf ve ene’l-abdü’l-fakīr Mehmed Es‘ad b. Mehmed el-Kâssâm-ı askerî bi-medîneti Kostantıniyyetüil-mahmiye -ufiye anhümâ ve gufire lehâ- Ve ba‘d işbu kitâbın tahrîrine bâ‘is budur ki; sâhibetü’l-hayrât fahrü’l-muhadderât Mihriban Sultan bt. Sultan Bayezid Hân tarafından vakf-ı âti’z-zikri ikrâra vekîl olup Maksud Bey b. Abdullah ve Mirzâ Bey b. Mucur nâm kimesneler şehâdetleriyle şer‘an vekâleti sâbite olan fahrü’l-akrân Mehmed Çelebi b. Abdürreyyân meclis-i şer‘-i kavîmde müvekkile-i müşârun-ileyh[â] hazretler[i] vakf-ı âti’l-beyâna li-ecli’t-tescîl mütevellî nasb ve ta‘yîn ettiği Mahmud Reis b. İhtiyâr nâm kimesne muvâcehesinde bi’l-vekâle ikrâr ve takrîr-i kelâm edip müvekkilem müşârun-ileyhâ Mihriban Sultan hazretleri mahmiye-i Galata hâricinde el-Hâc Memi mahallesinde vâki‘ bir tarafı Pazarbaşı Ahmed mülkü ve bir tarafı Şâmî Hatun mülkü ve bir tarafı Çâşnigîrzâde Mehmed Çelebi mülkü ve bir tarafı yine müvekkilem müşârun-ileyhâ mülkü ile mahdûd bir bâb fevkānî beyti ve muhavvata ve kenîfi muhtevî olan mülk menzilini cemî‘-i tevâbi‘i ile ve dahi hudûd-ı mezkûre ile mahdûd tûlen ve arzen on beş zirâ‘ arz-ı hâliyeyi hasbeten lillâhi’l-azîm vakf ve habs edip şöyle şart eyledi ki menzil-i mezbûrda müşârun-ileyhâ hazretlerinin utekāsından Rahime bt. Abdullah sâkine olup ol vefât ettikden sonra mezbûre Rahime’nin evlâdı ve evlâd-ı evlâdı sâkin olalar ve ba‘de’l-inkırâz mütevellî-i mezbûr Mahmud Reis sâkin ola ve ondan sonra mütevellî-i merkūmun evlâdı ve evlâd-ı evlâdı sâkin olalar neslen ba‘de neslin inkırâz ve ba‘de’l-inkırâz menzil-i mezbûr ecr-i misli ile îcâr olunup hâsıl olan ücreti her sene Medîne-i Münevvere fukarâsına irsâl oluna ve ta‘mîr ve termîmin menzil-i mezbûrda sâkin olan ede deyip vekîl-i merkūm menzil-i mezbûru mütevellî-i mersûma teslîm edip ol dahi kabz ve tesellüm eyledikden sonra ba‘de’l-muhâkeme hâkim-i muvakkı‘-ı hâze’l-kitâb hazretleri menzil-i mezbûru sıhhat ve lüzûmuna hükm-i sahîh ile hükmedip min-ba‘d nakz ve nakzına mecâl mümteni‘ü’l-ihtimâl ve tağyîr ve tebdîli muhâl oldu. “Fe men-beddelehû ba‘de mâ-semi‘ahu [fe inne]mâ ismühû ale’llezîne yübeddilûnehû innellâhe [semî‘un alîm]” Cerâ zâlike ve hurrire fî-evâili şehri Şa‘bâni’l-mu‘azzam li-sene ihdâ ışrîn ve elf el-hicretü’n-nebeviyye. Şühûdü’l-hâl: Bünyâd b. Muharrem, Ali b. Abdullah, Mehmed b. Şaban, Hasan b. Üveys, Mustafa b. ( ) el-müezzin, Yunus b. İbrahim ve gayruhüm.