Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 292 Hüküm no: 250 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya v. Nikifor’un Osman Ağa ve sairlerine olan borcunun tecil olunması Ma‘rûz, Medîne-i Üsküdar’da mütemekkin Basmacı tâifesinden arzuhâl eden Ağya v. Nikifor nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde ber-vech-i âtî dâyinlerinden derûn-ı arzuhâlde isimleri mastûr Hanparsum v. Serkiz ve Hüseynici Sahak v. Bedros ve Basmacı Ohannes v. Mosis ve Basmacı Kigork v. İstepan ve Basmacı Kirkor v. Abraham nâm zimmîler ile mu‘arrefetü’ş-şahs Elmas bt. Kigork ve Takohi bt. Ohan Nasrâniyelerden her biri muvâcehelerinde Osman Ağa b. Ahmed nâm kimesne hâzır olduğu hâlde benim mersûmûndan mersûm Hanparsum zimmîye cihet-i karzdan beş yüz seksen guruş ve mersûm Sahak zimmîye kezâlik cihet-i karzdan bin yüz yetmiş guruş ve mersûm Ohannes zimmîye yine cihet-i karzdan bin guruş ve mersûm Kigork zimmîye kezâlik cihet-i mezkûreden <> iki yüz guruş ve mersûm Kirhor zimmîye yine cihet-i mezkûreden beş yüz guruş ve mersûme Elmas Nasrâniyeye yine cihet-i merkūmeden üç yüz guruş ve mersûme Takohi Nasrâniyeye kezâlik cihet-i mezkûreden sekiz yüz guruş ve hâzır-ı merkūma dahi cihet-i karzdan iki bin guruş ki min-haysü’l-mecmû‘ zimmetimde mersûmûn ile hâzır-ı merkūma altı bin beş yüz elli guruş deynim olup lâkin benim deyn-i mezkûrumu dâyinlerim mersûmûna hâlen def‘aten bir vechile edâya iktidârım olmamağla ber-vech-i âtî istimhâl eylediğimde mersûmûn Hanparsum ve Sahak ve Ohannes ve Kirhor zimmîler ile Elmas ve Takohi Nasrâniyeler meblağ-ı mecmû‘-ı mezkûr altı bin beş yüz elli guruşdan alacakları olan [71b] dört bin beş yüz elli guruşu işbu târîh-i i‘lâmdan üç sene tamâmında ve hâzır-ı merkūm Osman Ağa târîh-i i‘lâm-ı mezkûrdan<< üç sene tamâmına>> bir buçuk sene tamâmına değin tamâmen kendülere edâ ve îfâ etmek üzere rızâlarıyla beni imhâl ve te’hîr eylediklerinde ben dahi meblağ-ı mecmû‘-ı mezkûru mümehhelen ve muahharen dâyinlerim mesfûrûn ile hâzır-ı merkūm Osman Ağa’ya tamâmen edâ ve teslîme müte‘ahhid oldum deyü mukırr-ı medyûn-ı mersûm Aya zimmînin bi’l-cümle takrîr-i meşrûhunu mersûmûn ile hâzır-ı merkūm Osman Ağa’dan her biri tasdîk ve tahkīk eyledikleri tescîl ve huzûr-ı [âlîlerine i‘lâm olundu]. Fî 5 Receb sene [12]57.