Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 249 Hüküm no: 189 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarıhatip mahallesinde Mehmed Çelebi’nin ev vakfının vakfiyesi Muvâfıkun li-aslihî min-bâbihî ve faslihî tevâfuka’l-kuzzeti bi’l-kuzzeti haysü lem yütrek fihî kelimetün fezzetün nemekahü’l-fakīr Mehmed el-Kādî bi-medîneti Selaniki’l-mahmiyeti humiyet an-külli beliyye Mâ-hurrire fî hâze’s-serîri’l-meşrû‘ min-te’sîsi usûli’l-vakfi ve’l-fürû‘ cerâ küllühû ledeyye ve’t-tezaha cemî‘uhu beyne yedeyye fe hakemtü bi’s-sıhhati ve’l-lüzûmi âlimen bi’l-hilâfi’l-ma‘lûm ve ene ekallü ibâdillâhi’l-ganî Ahmed b. Ali el-kassâmü’l-askerî bi-Selaniki’l-mahrûse hilâfeten -ufiye anhümâ- Elhamdü li-veliyyihî ve’s-salâtü alâ-nebiyyihî Muhammedin ve alâ-âlihî ve sahbihî ecma‘în ve ba‘d bu kitâbın tahrîrine sebeb oldur ki mahrûse-i ( ) mahallâtından Sarı Hatib mahallesi sâkinlerinden merhûm Kara Hacı evkāfına mütevelli olan sâhibü’l-hayrât Mehmed Çelebi eş-şehîr bi-Na‘limakar-zâde? mahfil-i kazâya gelip li-ecli maslahati’t-tescîl vakf-ı âtiye mütevellî nasb eylediği fahrü’l-a‘yân el-Hâc Derviş b. el-Hâc Sinan mahzarında ikrâr-ı tav‘î kılıp mahalle-i mezbûrede vâki‘ bir tarafı merhûm Musazâde dârı ve bir tarafı Kara İbrahim mülkü ve tarafeyni merhûm Kara Hacı ve Hacı Şaban vakıf dârları ve mahalle-i mezbûrede Çınarlıçeşme ile mahdûd olup dâhiliyyesi iki kırışlı orta sofalı tahtânî evleri ve diğer bir bâb tahtânî kilârı ile ve bahçeyi ve fırını ve muhavvatayı ve hâriciyyesi fevkānî kapı üzerinde bir bâb hücreyi ve muhavvatayı müştemil olan mülk menzilimi cemî‘-i hudûdu ve hukuku ile hasbeten lillâhi’l-azîm ve haseneten li-rûhi resûlihi’l-kerîm vakf ve habs eyleyip mütevellî-i mesfûra tahliyye ve teslîm eyledim ol dahi vakıf için tesellüm ettikden sonra şöyle şart eyledim ki mâdâm ki ben kayd-ı hayâtda olam tebdîl ve tağyîr ve tasarruf ve süknâ bana münhasır ola ve ba‘de irtihâl evlâd-ı evlâd-ı evlâdına ile’l-inkırâz meşrût olup ba‘de inkırâzihim sâbıkā fevt olan merhûme zevcem Fâtıma Hatun’un atîkalarından menkûham olan Mülayim ve Ziyâde bt. Abdullah nâm hatunlar menzil-i mevkūf-ı mezbûru ber-vech-i münâsafa adl ile taksîm edip nıfs-ı dâhiliyyesi tarafına mezbûre Mülayim ve nısf-ı âharına mezkûre Ziyâde mutasarrıfe olalar ve evlâd-ı evlâd-ı ve evlâd-ı evlâdlarına neslen ba‘de neslin minvâl-i mezbûr üzere tasarruf ve süknâ meşrûta ola. Eğer mezbûretânın biri fevt olup veyâ evlâdı münkarıza olup uhrâsı bâkīye veyâ evlâdından biri bâkīye olursa hâssaten menzil-i merkūmun tasarrufu ona münhasıra ola ve ba‘de’l-inkırâzihim menzil-i mevkūf-ı mezbûr hâkimü’l-vakt olan efendi hazretlerinin ilm-i şer‘î ile bey‘-i men-yezîd olunup kısmetden hâsıl olan semeni bir mu‘temedün-aleyh kimesne ile Medîne-i Resûllullâh hazretine îsâl olunup fukarâ-i Medîne’nin me’ûnetine sarf oluna deyu vâkıf-ı mezbûr hatm-i kelâm edicek mütevellî-i merkūm dahi vicâhen ve şifâhen tasdîk ve tahkīk edip menzil-i mevkūf-ı mezbûru vakıf için kabz eyledim deyu i‘tirâf ettikden sonra ba‘de’l-münâza‘a hâkim-i muvakkı‘-ı hâze’l-kitâb cânib-i vakfı evlâ ve ahrâ görmeğin menzil-i merkūmun evvelen sıhhatine sâniyen lüzûmuna hükmeylemeğin mâ-vaka‘a bi’t-taleb sebt olundu. Fî-evâhiri Rebî‘i’l-âhir li-sene sitte ve elf. Şühûdü’l-hâl: Abdurrahman Çelebi el-mülâzım, el-Hâc Abdurrahman b. el-Hâc Mehmed, Mehmed Çelebi b. Nasuh, el-Hâc Mustafa b. el-Hâc Nasuh, Fahrü’l-hutebâ Yusuf Çelebi b. İbrahim, Hüseyin Çelebi b. Nasuh el-hatîb, el-Hâc Mehmed b. el-Hâc Ali el-müderris, Nurullah Çelebi b. Mehmed, Hüsrev b. Abdullah, Ali Çelebi b. el-Hâc Mehmed, el-Hâc Ali b. Sefer Kethüdâ, Ali Çelebi b. Hüsrev, Ahmed Halîfe b. Durmuş, Abdi Beşe Muhzır-ı askerî, Ahmed Halîfe b. el-Hâc Mahmud, İsa Ma‘cûnî, el-Hâc Musa b. Ramazan ve gayruhüm mine’l-hâzırîn.