Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 252 Hüküm no: 191 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı âli yeniçerilerinden Mustafa b. Abdullah’ın ev ve para vakfı Vaka‘a el-emrü hasbemâ hurrire Harrerehü’l-fakīr İbrahim b. el-Hâc Hayreddin el-müvellâ hilâfeten bi-medîneti Kostantıniyyeti’l-mahmiye -ufiye anhümâ- Fî-zımnihî mâ-yu‘teber inde’s-sübûti’l-mu‘tebere ketebehü’l-fakīr Es‘ad -ufiye anh- -Mahmiye-i İstanbul’da Molla Fenarî mahallesi sâkinlerinden- Mahmiye-i İstanbul’da Molla Fenarî mahallesi sâkinlerinden umdetü’l-hutebâ İbrahim Efendi b. Abdülvehhab meclis-i şer‘-i kavîmde menzil-i âti’l-beyâna vâzı‘atü’l-yed olduğu nehc-i şer‘î üzere sâbite olan fahrü’l-muhadderât Belkıs Hatun bt. Abdullah mahzarında üzerine takrîr-i da‘vâ edip bundan akdem mezbûrenin zevci olup elli dördüncü Ağa Bölüğü’nden Dergâh-ı âlî yeniçerileri zümresinden iken müteveffâ olan Mustafa b. Abdullah mahalle-i mezbûrede vâki‘ bir tarafı Molla Şeref vakfına ve bir tarafı Fâtıma bt. Mehmed mülküne ve bir tarafı Fâtıma bt. Abdullah mülküne ve <> taraf-ı râbi‘i tarîk-i âmma müntehî olup iki tahtânî ve iki fevkānî beyti ve bi’r-i mâyı ve kenîfi ve ahırı ve cüneyneyi müştemil olan mülk menzili hâl-i hayâtında ve kemâl-i sıhhatinde vakf-ı sahîh ile vakfedip süknâsını sulbî oğulları Eyüb ve Mustafa’ya ba‘de vefâtihâ zevcesi mezbûre Belkıs’a ba‘dehâ mezbûre Belkıs’ın evlâdına ve evlâd-ı evlâdına neslen ba‘de neslin <> ba‘dehüm vâkıf-ı mûmâ-ileyhin kendi utekāsına ve evlâd-ı utekāsına ve evlâd-ı evlâd-ı utekāsına batnen ba‘de batnin ve fer‘an gıbbe aslin mutasarrıf olalar. Ba‘de’l-inkırâz -el-iyâzü billâh min-kahri’l-feyyâz- Medîne-i Münevvere -alâ-sâkinihâ salavâtü mükerrere- Evkāfı mütevellîsi yediyle îcâr olunup icâresi fukarâ-i Medîne’ye sarf oluna deyu şart edip ve yine vâkıf-ı merhûm mezbûr hâl-i hayâtında ve kemâl-i sıhhatinde kendi mâlından nakd-i fıddî râyic fi’l-vakt üç bin akçesini cümle mâlından ifrâz ve sâir menâlinden imtiyâz-ı tâmla mümtâz kıldıkdan sonra hasbeten lillâhi te‘âlâ ve haseneten li-rûhi resûlihi’l-mu‘allâ vakf ve habs edip şöyle şart eyledi ki meblağ-ı mezbûr her yılda onu on bir buçuk akçe olmak üzere mu‘âmele-i şer‘iyye ve murâbaha-i mer‘iyye ile alâ-vechi’l-helâl istirbâh ve istiğlâl için sîmâlarında âsâr-ı emânet-i zâhire ve beşerlerinde envâr-ı istikāmet-i bâhire olan tüccâr-ı zevi’l-iktirân rehn-i kavî ve kefîl-i melî ile mu‘âmele olundukdan sonra bi-inâyetillâhi’l-meliki’l-mennân her senede hâsıl olan ribhden yevmî bir akçe vazîfe ile mahmiye-i mezbûrede mezbûr Molla Şeref Câmi‘-i şerîfi’nde her kim imâm olursa kable salâti’l-mağrib cehren bir sûre-i Mülk tilâvet edip sevâbını vâkıf-ı mezbûrun rûhuna ihdâ eyleye ve zikr olunan elli dördüncü Ağa Bölüğü’nde her kim odabaşı olursa vakf-ı mezbûr üzerinde nâzır olup ribh-i mezbûrdan bâkī kalan akçeyi nezâreti hasebi ile kabz eyleye deyip tevliyet-i hasbiyesini evvelen kendiye ba‘de vefâtihî ve ben öldükden sonra mezbûr Molla Şeref Câmi‘i’nde imâm olanlara şart edip menzil-i mezbûru ve meblağ-ı merkūmu teslîm-i mütevellî edip vakfiyyetine hükm-i hâkimü’ş-şer‘ lâhik oldukdan sonra yine tevliyetim hasebiyle menzil-i mezbûru ve meblağ-ı merkūmu kabz etmiş iken vefât ettikde verâseti sulbî oğulları Eyüb ve Mustafa’ya ve mezbûre Belkıs’a münhasıra olup ba‘dehû mezbûrân Eyüb ve Mustafa dahi müte‘âkiben vefât ettiklerinde verâsetleri vâlideleri mezbûre Belkıs’a münhasıra olmağın menzil-i mezbûre ve meblağ-ı merkūme ve sâir muhallefâtının cümlesine mezbûre Belkıs vaz‘-ı yed etmişdir. Tevliyetim hasebi ile menzil ve meblağ vakfiyyet üzere bana kabz ve zabt ettirilmek matlûbumdur deyip suâl olundukda mezbûre Belkıs vech-i meşrûh üzere <> menzil-i mezbûru meblağ-ı mesfûru müteveffâ-yı mezbûr hâl-i hayâtında vakf-ı sahîh ile şurût-ı mezkûre murâ‘âtı üzere vakfedip sıhhat ve lüzûm ve vakfiyyetine hükm-i hâkimü’ş-şer‘ lâhik olmuşdur deyu tâyi‘aten ikrâr ve kabûl etmeğin ikrârı mûcebince menzil-i mezbûru ve meblağ-ı merkūmu mütevellî-i merkūma teslîme tenbîh olunup mâ-vaka‘a bi’t-taleb ketb olundu. Tahrîren fî-gurreti Cumâdelûlâ li-sene erba‘a ışrîn ve elf. Şühûdü’l-hâl: Mustafa Halîfe b. Pervâne el-imâm, Mehmed b. Yusuf er-râcil eş-şehîr bi-Mısırlızâde, el-Hâc Haydar b. Abdullah er-râcil, Ahmed b. Abdullah er-râcil, Mehmed b. Abdullah er-râcil, diğer Mehmed b. Abdullah er-râcil, Ali Beşe b. Hüseyin er-râcil, Ferhad b. Abdullah er-râcil ve gayruhüm.