Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 257 Hüküm no: 197 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun bt. Hüseyin Efendi’nin Piyalepaşa mahallesinde bulunan bahçesini vakfettiği Elhamdülillâhi’l-vâkıfi alâ-külli hâl el-muttali‘u alâ-mâ fi’l-bâl ve’s-salâtü alâ-seyyidinâ Muhammedin erbâbi’l-fazli ve’l-kemâl ve alâ-âlihî ve ashâbihi hayre ashâbin ve âlin ve ba‘d işbu vakfiyye-i sahîha-i şer‘iyyenin sâhibesi olup hâlâ mahmiye-i İstanbul mahallâtından Âşık Paşa mahallesinde sâkine olan kıdvetü’l-muhadderât Kamer Hatun bt. Hüseyin Efendi meclis-i şer‘-i kavîmde vakf-ı âti’l-beyânı li-ecli’t-tescîl mütevellî nasb ve ta‘yîn ettiği Hasan Bey b. Mehmed nâm bevvâb-ı sultânî mahzarında ikrâr-ı tâm ve takrîr-i kelâm edip mahrûse-i Galata muzâfâtından kasaba-i Kasımpaşa’da Piyale Paşa mahallesinde vâki‘ olup hudûdunun bir tarafı el-Hâc Nekkarezen veresesi mülklerine ve bir tarafı Cerrâh Mustafa mülküne ve bir tarafı vâdiye ve tarîk-i âmma müntehî olup hâlâ beş bâb odayı ve üç bostan kuyusunu ve eşcâr-ı müsmire ve gayr-i müsmireyi muhtevî olan mülk hadîkamı hasbeten lillâh vakfedip süknâsını evvelen kendi nefsime ba‘de’l-vefât îcâr olunup hâsıl olan ücreti Medîne-i Münevvere fukarâsına irsâl oluna deyu şart ve hadîka-i mezbûreyi mütevellî-i merkūma teslîm edip ol dahi kabz ve tesellüm edip sâir mütevellîler gibi tasarruf eylesin dedikde <> vâkıfe-i mezbûreyi ikrâr-ı meşrûhunda mütevellî-i mezbûr vicâhen tasdîk edip ba‘de’l-muhâkeme hâkim hükmedicek mâ-vaka‘a kayd şud. Fî-evâili Rebî‘i’l-evvel min-şühûri sene sitte ve ışrîn ve elf. Şühûdü’l-hâl: el-Hâc Muslu Çelebi b. Kasım el-kâtib, Ahmed Çelebi b. Kasım el-Üsküdarî, el-Hâc Ahmed b. Ramazan, Receb Bey b. ( ) el-bevvâb, Ali Çelebi b. Halil, Ömer Efendi b. ( ) el-müderris, Rıdvan Bey b. ( ) el-bevvâb, el-Hâc İshak ( ) el-bevvâb, Ali Çelebi b. Sinan Kethüdâ, Hüseyin Efendi el-kâtib ve gayruhüm.