Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 257 Hüküm no: 198 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arık Bali Çavuş b. İskender’in evinin Haremeyn Vakfı’na ait olduğu Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hasan Bey b. Mehmed nâm bevvâb meclis-i şer‘de menzil-i âti’l-beyâna mülkiyyet zu‘mu ile vâzı‘ü’l-yed olan Mehmed Çavuş b. Kurd mahzarında üzerine tasvîr-i da‘vâ edip mahmiye-i mesfûre mahallâtından Kumkapısı kurbünde Feridun Ağa mahallesinde vâki‘ bir tarafı Derzibaşı mülküne ve bir tarafı Süleyman Ağa vakfına ve iki tarafı tarîk-i âm ile mahdûd olup büyût-ı müte‘addideyi müştemil olan menzili mahalle-i merkūmede sâkin iken bundan akdem vefât eden Arık Bâli Çavuş b. İskender nâm kimesne hâl-i hayâtında ve kemâl-i sıhhatinde iken vakf-ı sahîh-i şer‘î ile vakfedip süknâsı evvelâ kendi nefsine ba‘dehû evlâdına ve evlâd-ı evlâd-ı evlâdına ve ba‘de’l-inkırâz ecr-i misli ile îcâr olunup beher sene hâsıl olan icâresi fukarâ-i Haremeyn-i Muhteremeyn’e irsâl oluna deyu vakf ve ta‘yîn etmişidi. El-hâletü hâzihî merkūm Bâli Çavuş ve evlâdı münkarız olmağla ber-mûceb-i şart-ı vâkıf menzil-i mesfûr fukarâ-i Haremeyn-i Şerîfeyn’e âid ve râci‘ olmuşiken müşârun-ileyh Mehmed Çavuş bi-gayrı vech-i şer‘î vaz‘-ı yed edip mülkiyyet üzere tasarruf eder suâl olunup ref‘-i yedine tenbîh ve cânib-i vakfa zabt ettirilmek matlûbumdur dedikde gıbbe’s-suâl merkūm Mehmed Çavuş cevâbında fi’l-hakīka menzil-i mesfûra mülkiyyet zu‘mu ile vaz‘-ı yed eyledim. Lâkin vech-i meşrûh üzere vakfolduğu ma‘lûmum değildir deyu inkâr edicek mütevellî-i merkūmdan müdde‘âsını mübeyyine beyyine taleb olundukda udûl-i Müslimînden mahalle-i mezbûre ahâlîsinden Ali Efendi b. Murad ve Hüsrev b. Abdullah ve Eyüb Çelebi b. İsrafil nâm kimesneler li-ecli’ş-şehâde hâzırûn olup istişhâd olundukda fi’l-hakīka vech-i meşrûh üzere müteveffâ-yı merkūm hâl-i hayâtında ve kemâl-i sıhhatinde menzil-i mezbûru vakf-ı sahîh-i şer‘î ile vakfedip süknâsını evvelâ kendi nefsine ba‘dehû evlâdına ve evlâd-ı evlâdına ve ba‘de’l-inkırâz ecr-i misli ile îcâr olunup beher sene hâsıl olan ücreti fukarâ-i Haremeyn-i Şerîfeyn’e irsâl oluna deyu vakf ve ta‘yîn eylemişidi. Ber-vech-i muharrer menzil-i merkūmun vakfiyyetine şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl şehâdetleri makbûle olmağın mûcebiyle menzil-i mezbûrun vakfiyyetine hükmolundukdan sonra müşârun-ileyh Memi Çavuş’un ref‘-i yedine tenbîh birle vâki‘ ketb olundu. Fî-evâhiri Saferi’l-hayr li-sene sitte ve ışrîn ve elf. Şühûdü’l-hâl: Halil Efendi b. ( ) el-kādî, Mustafa Çelebi b. ( ) el-kâtib, Ali Çelebi b. Sinan, Ahmed Çelebi b. ( ) el-cündî, Ferhad Bey b. ( ) el-bevvâb, Muslu Çelebi b. Kasım el-Üsküdar[î], Receb Bey b. Abdullah. Mustafa Çelebi b. Abdullah el-kâtib, Mustafa Bey b. Abdullah el-bevvâb ve gayruhüm.