Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 258 Hüküm no: 199 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcı mahallesinden Mustafa Bey b. Abdülmennan’ın ev vakfı Elhamdülillâhi Rabbü’l-erbâbi ve mâlikü’r-rikâbi ve’s-salâtü alâ-âlihî ve ashâbihi ammâ ba‘d işbu kitâb-ı sıhhat nisâbın sâhibi mahmiye-i Kostantıniyye mahallâtından Çadırcı mahallesi sâkinlerinden fahrü’l-akrân Mustafa Bey b. Abdülmennan meclis-i şer‘de li-ecli’t-tescîl mütevellî ta‘yîn eylediği el-Hâc Hasan Bey b, Mehmed mahzarında takrîr-i kelâm edip mahalle-i merkūmede vâki‘ bir tarafı Haremeyn-i Şerîfeyn vakfına ve bir tarafı mahalle-i mezbûre müezzinine mevkūf olan menzile ve bir tarafı Hasan Çavuş b. ( ) mülküne ve bir tarafı tarîk-i âmma müntehî olup iki bâb tahtânî ve üç bâb fevkānî evleri ve muhavvatayı ve bi’r-i mâyı müştemil olan mülk menzilimi vakf-ı sahîhi şer‘î ile [vakfedip] şöyle şart eyledim ki hayâtda oldukca içinde sâkin olam vefâtımdan sonra zevcem Râziye bt. Abdullah’a ve ba‘dehû evlâdım ve evlâd-ı evlâd-ı evlâdım ile’l-inkırâz sâkin olalar ve ba‘de’l-inkırâz menzil-i merkūm ecr-i misli ile îcâr olunup her sene hâsıl olan ücreti Medîne-i Münevvere fukarâsına irsâl oluna deyu şart ve ta‘yîn edip menzil-i mezbûru mütevellî-i merkūma teslîm-i şer‘î ile teslîm edip ol dahi kabz ve tesellüm edip vakfiyyet üzere mutasarrıf oldu deyu tertîb-i vakf ve şerâit ve ta‘yîn-i kuyûd ve zavâbıt eyledikde mütevellî-i merkūm dahi bi’l-müvâcehe tasdîk edip emr-i vakf tamâm oldukdan sonra vâkıf-ı mezbûr takrîr-i kelâm edip vakf-ı akār Hazret-i İmâm-ı Azam rahmetullâhi re’y-i şerîfleri üzere lâzım olmayıp rücû‘u câiz olmağın vakf-ı mezbûrdan rücû‘ ettim deyu mütevellî-i merkūmdan istirdâd ettikde mütevellî-i mesfûr dahi cevâb verip İmâmeyn-i hümâmeyn katlarında vakf-ı akārın lüzûm ve devâm ve te’yîd emr-i mütehattimdir deyu redden imtinâ‘ edip sadr-ı kitâbda tevkī‘-i refî‘i vâki‘ hâkimü’ş-şer‘a murâfa‘a oldukdan sonra hâkim-i mûmâ-ileyh dahi cânib-i lüzûmu vakfa evlâ ve ahrâ görüp İmâmeyn-i hümâmeyn kavilleri üzere vakf-ı akārın sıhhat ve lüzûmuna hükmedicek vâkıf-ı mezbûr bu bâbda mubtıline fevz ü felâh bulmayıp vakf-ı merkūm vakf-ı sahîh ve lâzım olup min-ba‘d nakz ve nakzına mecâl muhâl ve mümteni‘ü’l-ihtimâl oldu “Fe men-beddelehû ba‘de mâ-semi‘ahu fe-innemâ ismühû ale’llezîne yübeddilûnehû innellâhe semî‘un alîm” ve ecrü’l-vâkıf ale’l-hayyi’l-cevâdi’l-kerîm. Tahrîren fî-evâhiri Saferi’l-hayr min-şühûri sene sitte ve ışrîn ve elf. Şühûdü’l-hâl: Mustafa Efendi b. Abdi el-imâm, Ömer Efendi b. Bekir el-müezzin, Bekir b. Mehmed, Mustafa b. Mehmed, Rıdvan b. Abdullah ve gayruhüm.