Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 293 Hüküm no: 251 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’in, Çengel köyü İmamı Mehmed Efendi aleyhindeki davasının meşru olmadığı Ma‘rûz, Mukaddemâ gayr-ı reşîde olup hâlâ kendüye sahvet-i rüşd-i tâm geldiği ser-etibbâ-yı Sultânî ve Rumeli pâye-i celîlesiyle mübâhir devletlü Abdülhak Efendi hazretlerinin i‘lâmından ve erbâb-ı vukūfun ihbârından müstebân olan sâhibe-i arzuhâl mu‘arrefetü’z-zât Fâtıma Hatun bt. Mehmed meclis-i şer‘-i şerîf-i lâzımü’t-tevkīrde derûn-ı arzuhâlde mezkûrü’l-ism Çengel karyesi imâmı el-Hâc Mehmed Efendi b. Mustafa muvâcehesinde mezbûre Fâtıma Hatun’un li-ebeveyn er karındaşı Mustafa Ağa hâzır olduğu hâlde işbu târîh-i i‘lâmdan bir buçuk sene mukaddem ben muhtell-i dimâ‘ iken karye-i mezbûrede vâki‘ menzil derûnunda mevcûde emvâl ve eşyâm ma‘rifet-i şer‘le tahrîr olunduğu hînde mezbûr el-Hâc Mehmed Efendi hâzır bi’l-meclis olup karındaşım hâzır-ı mezbûr Mustafa Ağa ile emvâl-i müşterekemizden hâric-ezdefter mecmû‘u iki bin dokuz yüz elli guruş kıymetli beş minder ve üç Kıbrıs-kârî yasdık ve dört yorgan ma‘a çârşeb ve altı baş yasdığı ve bir mangal ve iki sini ve iki âbdest ve el leğeni ve üç yüz yasdığı ve üç güğüm ve üç ibrik ve iki maşraba ve iki hamam ve su tası ve yedi tencere ve iki çorba tası ve iki lenger ve üç tepsi ve bir kazgan ve iki dülbend ve şâlî anteri ve iki dülbend ve işleme gömlek ve dört işleme havlu ve bir işleme peşkir ve bir çit sofra ve bir sarı çiçekli şal ve yirmi iki tabak ve on üç fincan ve on iki sahan ve bir satır ve bir bel ve yedi kazma ve bir bahçe tarağı ve bir çapa ve iki ipek kenarlı gömlek ve dört meşin ve yedi arşın ve dört dizlik ve bir müsta‘mel kürk kabı ve bir müsta‘mel anteri ve on kaşık ve dört boğça ve üç silecek ve üç havlu ve dokuz çârşeb ve bir fener ve bir tırnak kür[k] ve üç ihrâm ile iki kıt‘a menzil ve bir kıt‘a bağ temessükümüz telef ve zâyi‘ ve mezbûr el-Hâc Mehmed Efendi hîn-i tahrîrde hâzır bi’l-meclis ve mücerred karye-i mezbûre imâmı olduğuna binâen zikr olunan eşyâ ve temessüklerimizi mezbûr el-Hâc Mehmed Efendi’den taleb ederiz deyü hâzır-ı mezbûr Mustafa Ağa ile bi’l-ma‘iyye mezbûr el-Hâc Mehmed Efendi’nin külliyen inkârına mukārin takrîr-i meşrûhu üzere tasaddî eyledikleri da‘vâları meşrûha ve iltifâta şâyân olmadığı kendülere tefhîm ve da‘vâ-yı mezkûresiyle mezbûr el-Hâc Mehmed Efendi’ye bî-vech-i şer‘î mu‘ârazadan men‘ olunduğu tescîl ve huzûr-ı âlîlerine i‘lâm olundu. Fî 11 B sene [12]57.