Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 259 Hüküm no: 200 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olan evin kullanım hakkının Mehmed Bey b. Mustafa’ya bırakıldığı Haremeyn-i Şerîfeyn Evkāfı’ndan mahmiye-i İstanbul mahallâtından Nahılbend mahallesinde vâki‘ bir tarafı Mevzûne Hatun vakfı ve bir tarafı Ya‘kub Ağa vakfı ve bir tarafı mahalle-i mezbûre mescidi duvarı ve bir tarafı tarîk-i âm ile mahdûd tahtânî iki beyti ve bir sofayı ve bir ahırı ve bir fırın ve bir selâmlığı ve bi’r-i mâyı ve muhavvatayı ve hadîkayı ve kenîfi müştemil olan menzile icâre-i mu‘accele ve yevmî dörder akçe müeccele ile mutasarrıfe olan fahrü’l-muhadderât Fâtıma bt. Abdullah meclis-i şer‘de işbu sâhibü’l-kitâb fahrü’l-akrân Mehmed Bey b. Mustafa nâm bevvâb-ı sultânî mahzarında takrîr-i kelâm edip menzil-i merkūmun hakk-ı tasarrufunu vakf-ı mezbûr mütevellîsi Hasan Bey ma‘rifeti ile mûmâ-ileyh Mehmed Bey’e on iki bin nakd-i râyic fi’l-vakt akçeye tefvîz eyledim ol dahi vech-i meşrûh üzere tefevvüz ve kabûl ettikden sonra mukābele-i tefvîzden olan meblağ-ı mezbûru müşârun-ileyh Mehmed yedinden bi-tamâmihî alıp kabz eyledim ba‘de’l-yevm icâre-i müeccele ile mezbûresini mâh be-mâh cânib-i vakfa edâ eyleyip hâricden kimesne mâni‘ olmayıp keyfe mâ yeşâ mutasarrıf olsun dedikde gıbbe’t-tasdîk mâ-hüve’l-vâkı‘ ketb olundu, Fî-evâhiri Rebî‘i’l-evvel min-şühûri sene sitte ve ışrîn ve elf. Şühûdü’l-hâl: Ahmed Efendi b. Ali el-imâm, Yusuf Efendi b. Abdullah el-müezzin, Kurd Bey b. Abdullah el-bevvâb, İshak Bey b. Abdullah el-cündî, Mehmed Çelebi b. Ali er-râcil, Yusuf Bey b. ( ) el-bevvâb, Ferhad Bey b. ( ) el-bevvâb, Mahmud b. Mehmed, Mahmud b. Ali ve gayruhüm.