Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 260 Hüküm no: 201 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selanik’in Vodine kasabasında bulunan ve Kurd Bey b. Abdülmüteâl tarafından haksız olarak tasarruf edilen evin Haremeyn Vakfı’na ait olduğu Mahmiye-i İstanbul’da Haremeyn-i Şerîfeyn Evkāfı’na mütevellî olan el-Hâc Hasan Bey b. Mehmed meclis-i şer‘de menzil-i âti’l-beyâna bi-gayrı vech-i şer‘î vâzı‘ü’l-yed idiği nehc-i mu‘teber üzere sâbit olan fahrü’l-emâsil Kurd Bey b. Abdülmüte‘âl mahzarında üzerine bi’t-tevliye tasvîr-i da‘vâ edip vilâyet-i Rumeli’nde Selanik sancağında kasaba-i Vodine’de Ebulfeth Sultan Mehmed Hân Câmi‘-i şerîfi kurbünde vâki‘ bir tarafı Ferhad b. Abdullah es-Sabunî mülkü ve bir tarafı Muslu Çavuş b. el-Hâc Mehmed mülkü ve bir tarafı vâdi ve bir tarafı tarîk-i âm ile mahdûd olup hâriciyye muhavva[ta]sında bir bâb fevkānî oda ve tahtında bir ahır ve selâmlık ve dâhiliyye muhavvatasında iki bâb tahtânî oda ve yan sofaları ve hamâm ve ahır ve cüneyneyi muhtevî olan menzil bundan akdem vefât eden ( ) hâl-i sıhhatinde mülkü iken evvelen kendi nefsine ba‘de evlâdına ve evlâd-ı evlâdına ve ba‘de’l-inkırâz fukarâ-i Haremeyn’e vakf-ı sahîh-i şer‘î ile vakfedip hâlâ merkūm ( )vefât edip ve evlâdı dahi münkarız olmağla ber-mûceb-i şart-ı vâkıf-ı mûmâ-ileyh menzil-i mezbûr bi-cümleti’t-tevâbi‘ fukarâ-i mezbûrîne âid olmağın müşârun-ileyh Kurd Bey bi-gayrı vech-i şer‘î vaz‘-ı yed edip tasarruf eder suâl olunup ref‘-i yedine tenbîh ve vakfa zabt ettirilmek matlûbumdur gıbbe’s-suâl müteveffâ-yı merkūmdan müdde‘âsını mübeyyine beyyine taleb olundukda udûl-i Müslimînden olup câmi‘-i mesfûr mahallesi sâkinlerinden Mehmed Efendi b. Ahmed el-Kādî ve Hüseyin Çelebi b. Mahmud el-cündî ve Derviş Ali b. Ahmed ve Ata Bey b. Ali nâm kimesneler meclis-i şer‘a li-ecli’ş-şehâde hâzırûn olup gıbbe’l-istişhâd menzil-i mesfûr vech-i meşrûh üzere ( ) vakfı olduğu tesâmu‘-ı şer‘î ile ma‘lûmumuz olmağın ber-vech-i meşrûh vakf-ı lâzım vakf idiğine şâhidleriz şehâdet dahi ederiz [deyu] edâ-i şehâdet-i şer‘iyye eylediklerinde menzil-i mesfûrun vakfiyyetine hükmolunup mûmâ-ileyh Kurd Bey’in ref‘-i yedine tenbîh vâki‘ hâ[l] ketb olundu. Fî-evâili Rebî‘i’l-âhir sene sitte ve ışrîn ve elf. Şühûdü’l-hâl: Rıdvan Ağa b. ( ) el-müteferrika, Mehmed Bey eş-şehîr bi-Meydânî, Mehmed Efendi b. Reyyân İmâm, Ali Çelebi b. Sinan, Muslu b. Kasım ve gayruhüm.