Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 261 Hüküm no: 202 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mat kazasına bağlı Kalos köyünden Muslih Subaşı b. Abdullah’ın vasiyeti Lemmâ sebete mazmûnu hâze’l-kitâb muvâfıkun li’ş-şer‘i’l-müstetâb kabiltühû ve emdaytühu ve hakemtü bi-sıhhatihî ve lüzûmihî ve ene’l-fakīr ileyhi sübhânehû Mehmed b. Süleyman el-Kādî bi-Mat -ufiye anhümâ- Mâ-hurrire fî-hâzihi’l-vesîkati’ş-şer‘iyyeti’s-sahîfeti’l-mer‘iyye min-asli’l-vakfi ve şerâitihî ve kuyûdihî ve zavâbıtihi sahha küllühû ledeyye ve tekarrere beyne yedeyye ve innî kadaytü bi-sıhhatihî ve lüzûmihî fî-husûsihî ve umûmihî ve ene’l-fakīr ilâ-rahmeti rabbihi’l-kadîr Ali b. Mehmed el-Kādî bi-Mat -ufiye anhümâ- Elhamdü li-veliyyihî ve’s-salâtü alâ-nebiyyihî Muhammedin ve âlihî ve sahbihî ecma‘în ve ba‘d işbu vakfiyyenin sâhibi olup Mat kazâsına tâbi‘ Kalos nâm karye sâkinlerinden Muslih Subaşı b. Abdullah nâm kimesne ahlas-ı mâlından yüz yirmi bin nakd-i râyic fi’l-vakt akçeyi vakf ve habs edip Muslihiddin Hoca nâm kimesneyi li-ecli’t-tescîl mütevellî nasb edip şöyle şart eyledi ki meblağ-ı mezbûr tarîk-i şer‘î üzerine rehn-i kavî ve kefîl-i melî ile veyâhud ikisinden biri ile her senede şerâit-i şer‘iyyede irtihân olunup alâ-vechi’l-istiğlâl istirbâh olunup zâyi‘ olmak ihtimâli olmaya ve böyle şart eyledikde kazâ-i mezbûr tevâbi‘inden mezkûr Kalos nâm karye sâkinlerinden mescid-i mezbûrdan ta‘yîn eylediğim imâmlık ve tevliyet âhar mâlımdan İlyas Efendi’nin evlâdına ve evlâd-ı evlâdına meşrûta beher yevm imâm-ı mezbûra dörder akçe verile ba‘de salâti’l-fecr bir Yâsîn-i şerîf tilâvet edip ve ba‘de salâti’z-zuhr bir aşr-ı Kur’ân ve ba‘de salâti’l-asr bir Amme ve ba‘de salâti’l-ışâ bir sûre-i Mülk tilâvet edip sevâbını vâkıf-ı mezbûr rûhuna hibe eyleye müezzinlik dahi akrabamızdan Ali b. Mustafa’ya ve evlâd-ı evlâdına meşrûta eyledim yevmî üçer akçe vazîfe verile ve imâm olmadığı vakit ta‘yîn ettiğim virdi onlar tilâvet edeler ve mu‘allime dahi beher yevm üçer akçe vazîfe verilip ve kayyıma dahi bir akçe verilip ve hasır-ı hademe için yevmî bir akçe verile ve mütevellîye dahi beher yevm üçer akçe verile ve şart eyledim ki mahrûse-i İstanbul’da Tahtaminâre Mescidi mahallesinde vâki‘ olup bir tarafı Mustafa Çelebi evine ve bir tarafı Ca‘fer Çavuş evlerine bir tarafı müezzin sâkin olduğu …? ve bir tarafı tarîk-i âm ile mahdûd olan mülk menzilimde sulbiye kızım olan Emine sâkin olup ba‘dehû menzil-i mezbûrun süknâsını mezkûre Emine’ye ba‘dehû evlâdına ve evlâd-ı evlâdına meşrûta olup lâkin şol üzerine ki beher yevm üçer akçe vere ki biri imâma ve biri müezzine ve biri mütevellîye verile ba‘dehû mezkûre fevt olup veyâ evlâdı münkarız olursa zikr olunan menzil harâba müşrif olursa semen-i misli [ile] bey‘ olunup hâsıl olan meblağ ile yine mahrûse-i mezbûre[de] vakfeylediğim yüz yirmi bin akçe ile hesâb olunup dört hissede birini hazret-i sultânü’l-enbiyâ sallallâhu aleyhi ve sellem hazretlerinin ravza-i mutahharları fukarâsına vakfolup ve bir hissesi Mat-ı mezbûr başında vakıf tekyeye sarf oluna ve iki hissesi mescid ve mu‘allimhâneye vakfolup ve bu vakfa Haremeyn nâzırı hasbî nâzır olup hisse-i merkūmeyi fukarâ-i mezbûre için kabz ve irsâl eyleye ve sâir hisseleri dahi mahalli mahalline bi-tamâmihi îsâlde dakīka fevt etmeye ve mahrûse-i mezbûrede zimem-i nâsda vakfeylediğim yüz yirmi bin akçe tahsîl olunup noksân gelmek lâzım gelirse cümle metrûkâtımdan tekmîl olunup ve yine zikri mürûr eden mescid ve tekyenin ta‘yîn olunan vakf akçesinden karye-i mezbûrede vakf-ı mezbûr için akār iştirâ olunup ecr-i misli ile îcâr olunup <> hâsıl olan ribhi mesârifine alıverdikden sonra ve fazla kalırsa mescid ve tekye ta‘mîr ve termîm olunup ve yine karye-i mezbûre sâkinlerinden olan imâm ve müezzin ve cemâ‘at ve cümle ahâlî-yi karye hasbî nâzır beyler ve kādılar ve mütevellîler vakf-ı mezbûru ekl etmek isterlerse men‘ edeler deyu mütevellî-i merkūm mahzarında i‘tirâf ettikde mütevellî-i merkūm dahi vicâhen tasdîk edicek mâ-vaka‘a bi’t-taleb ketb olundu. Fî-evâili şehri Zilka‘deti’ş-şerîfe li-sene tis‘a ve tis‘în ve tis‘a mi’e. Şühûdü’l-hâl: Sinan Çavuş b. Mustafa, İskender b. Ali, Bekir Çelebi b. Muslihiddin, Ali Bey b. Mustafa, Murad b. Abdullah, Hasan b. Abdullah er-râcil, Hüseyin b. İskender, Hızır b. Sinan, Kurd b. İlyas ve gayruhüm.