Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 262 Hüküm no: 203 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali Çavuş b. İskender’in vakfettiği evin Haremeyn Vakfı mütevellisi tarafından İbrahim Ağa’ya kiralandığı Mahmiye-i İstanbul’da Haremeyn-i Şerîfeyn Vakfı’na mütevellî olan Hasan Bey b. Mehmed nâm bevvâb-ı sultânî meclis-i şer‘-i kavîmde işbu sâhibü’l-kitâb <<Ömer>> İbrahim Ağa b. Ca‘fer mahzarında bi’t-tevliye ikrâr-ı tâm ve takrîr-i kelâm edip mahmiye-i merkūmede Kumkapı kurbünde Feridun Ağa mahallesinde sâkin iken bundan esbak vefât eden Bâli Çavuş b. İskender hâl-i hayâtında ve kemâl-i sıhhatinde iken mahalle-i merkūmede vâki‘ bir tarafı Derzibaşı mülkü ve bir tarafı Süleyman Ağa vakfı ve iki tarafı tarîk-i âm ile mahdûd ve büyût-ı müte‘addideyi muhtevî olan mülk menzilini evvelâ kendi nefsine ba‘dehû evlâdına ve ba‘de’l-inkırâz fukarâ-i Haremeyne’ye vakfedip hâlâ merkūm Bâli Çavuş vefât edip ve evlâdı dahi münkarız olmağla menzil-i mezbûr bi-cümleti’t-tevâbi‘ fukarâ-i Haremyen-i muhteremeyne âid olmağın îcârı lâzım geldikde tâlibîne arz olunup ragabât-ı nâs münkatı‘a oldukdan sonra müşârun-ileyh İbrahim Ağa otuz bin akçe icâre-i mu‘accele ve yevmî üçer akçe icâre-i müeccele ve meremmât ve binâsına sarf ettiği meblağ mu‘accelesine mahsûb olmak üzere istîcâra tâlib olup bir akçe ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ olmağın ben dahi menzil-i mezbûru târîh-i kitâbdan otuz bin akçe icâre-i mu‘accele ve yevmî üçer akçe müeccele <> hesâbı üzere beher şehr doksan akçe icâre-i müeccele ve lâzım gelen meremmât-ı külliyye ve cüz’iyye ve müceddeden binâsına sarf ettiği icâre-i mu‘accelesine mahsûb olmak üzere müşârun-ileyh İbrahim Ağa’ya tevliyetim hasebi ile îcâr ve teslîm eyledim. Ol dahi ber-vech-i muharrer istîcâr ve kabûl eyledikden sonra icâre-i mu‘accelesi olan otuz bin akçeyi yedinden bi’t-tamâm alıp kabz eyledim. Ba‘de’l-yevm ta‘yîn olunan icâre-i müeccelesini mâh be-mâh cânib-i vakfa edâ edip keyfe mâ yeşâ mutasarrıf olsun dedikde gıbbe’t-tasdîk mâ-vaka‘a ketb olundu. Fî-evâili Cumâdelûlâ min-şühûri li-sene sitte ve ışrîn ve elf. Şühûdü’l-hâl: Mustafa Bey b. İbrahim el-bevvâb, Sinan Bey b. Kasım, Mahmud Bey b. ( ), Ferhad Bey b. Abdi el-bevvvâb, Ali Bey b. Ömer el-bevvâb ve gayruhüm.