Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 263 Hüküm no: 204 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üskübî mahallesinden Fatma bt. Mustafa Bey’in mülkünün vakfiyesi Min-aslihi’l-mahfûz nemekahü’l-fakīr Ahmed b. Alâeddin el-müvellâ hilâfeten bi-medîneti Kostantıniyyeti’l-mahmiye -ufiye anhümâ- bi-mahkemeti Mahmud Paşa Elhamdü li-veliyyihî ve’s-salâtü alâ-nebiyyihî Muhammedin ve âlihî ve sahbihî ecma‘în, ve ba‘d işbu vakfiyye-i sahîha-i şer‘iyyenin sâhibesi fahrü’l-muhadderât Fâtıma Hatun bt. Mustafa Bey tarafından vakf ve tesbîl ve nasb-ı mütevellî ve da‘vâyı rücû‘ âti’z-zikre Mehmed Bey b. Mahmud el-Kilârî ve el-Hâc Şaban b. Mustafa şehâdetleri ile sâbitü’l-vekâle vekîl olan Kasım b. Abdullah meclis-i şer‘de bi’l-vekâle takrîr-i kelâm edip mahmiye-i İstanbul’da Ayasofya-i kebîr kurbünde <> Üskübî mahallesinde vâki‘ bir tarafı Medîne-i Münevvere fukarâsına mevkūf menzil bir tarafı Ferhad Ağa vakfı ve bir tarafı Esmâ nâm hatuna meşrûta vakıf menzil ve bir tarafı Kadı İbrahim Efendi mülkü ve tarîk-i âm ile mahdûd muhavvateyni hâvî olup muhavvata-i dâhiliyyesinde iki bâb tahtânî beyti ve iki sofa ve üç fevkānî odayı ve muhavvata-i hâriciyyesi bir ahır ve fevkinde dört bâb oda ve bir sofa ve bi’r-i mâyı müştemil ve ile’l-ân müvekkilem mezbûre Fâtıma’nın silk-i mülkünde muntazam olan menzilini müvekkilem mezbûre için bi’l-vekâle vakf ve tesbîl ettim ve süknâ ve tasarrufunu müvekkilem hayâtda oldukca kendiye ve ba‘dehâ zevci Kâtib Ömer Çelebi b. Nasuh’a şart ba‘dehû süknâsını mezbûr Ömer Çelebi’nin evlâdına sonra evlâd-ı evlâdına sonra evlâd-ı evlâd-ı evlâdına meşrût ola. Bunların inkırâzından sonra süknâsını vâkıfe-i mezbûre ile mezbûr Ömer Çelebi’nin utekāsına meşrûta ola ve utekānın inkırâzından sonra utekānın evlâdına evlâd-ı evlâd-ı evlâd-ı evlâdına meşrûta ola ve ba‘de’l-inkırâzi’l-mecmû‘ menzil-i mezbûr mütevellî yediyle îcâr olunup her sene hâsıl olan icâresi Medîne-i Münevvere fukarâsına sarf olunmak meşrût ola deyu emr-i vakf ve şürûtunu itmâm etti ba‘dehû vekîl mezbûr menzil-i mezbûru li-ecli’t-tescîl mütevellî nasb ettiği Mehmed Çelebi b Hüseyin’e teslîm edip ol dahi vakıf için tesellüm edip teslîm ve tesellüm sahîh ve sarîh buldukdan sonra şerâit tescîl ve da‘vâ-yı rücû‘ ve redd-i cevâb-ı bâ-savâb birle hâkim-i muvakkı‘-ı hâze’l-kitâb vakf-ı mezbûrun sıhhat ve lüzûmuna hükm-i sahîh-i şer‘î ile hükmeyledi “Fe men-beddelehû ba‘de mâ-semi‘ahu ilh” Hurrire fi’l-yevmi’l-ışrîn min-Zilhicceti’ş-şerîfe li-sene selâse aşer ve elf min-hicreti men lehü’l-eşref. Şühûdü’l-hâl: Ahmed Çavuş b. Abdullah, el-Hâc Sinan b. Mustafa el-attâr, Mehmed Çelebi b. Mahmud el-kilârî, el-Hâc Musa b. Ahmed, Yusuf b. Bahadır el-cündî, el-Hâc Mehmed b. Hüseyin, Ca‘fer b. Abdullah Mütevellî, Ali Ağa b. Abdullah Hazînedârbaşı, Mehmed b. Yahya es-serrâc, Rıdvan Çavuş b. Abdullah, Yusuf Çelebi b. ( ) el-attâr, Musa Halîfe b. ( ) el-imâm, Ferhad b. Abdullah Abdürrahim b. Ahmed ve gayruhüm.