Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 267 Hüküm no: 208 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kejdehân Ali Paşa’nın vakfı olan Ortaköy’deki bahçenin Haremeyn Vakfı mütevellisi tarafından Rıdvan Ağa’ya kiralandığı Mahmiye-i İstanbul’da hâlâ Haremeyn mütevellîsi Hasan Bey b. Mehmed nâm bevvâb meclis-i şer‘de sâbıkā kāimmakām-ı sadrıazam olan düstûr-ı mükerrem müşîr-i mufahham Mehmed Paşa hazretlerinin kapıcıbaşısı olan sâhibü hâze’l-kitâb Rıdvan Ağa b. Abdüddâim mahzarında ikrâr-ı tâm ve takrîr-i kelâm edip mahmiye-i Galata muzâfâtından Ortaköy nâm mevzi‘de vâki‘ üç su kuyusunu ve bir kârgîr zindânı ve bir kayık limânını ve yedi ocak menzili ve hamâm ve kerm ve bi’r-i mâ-i câriyi ve kenîfi müştemil ve etrâf-ı <> erba‘ası Ömer Çavuş b. ( ) ve Kara Muslu b. ( ), bahçeleri ve sâhil-i bahr ve tarîk-i âm ile mahdûd olup merhûm Kejdehân Ali Paşa bahçesi demekle ma‘rûf bahçeyi merhûm-ı müşârun-ileyh Ali Paşa hâl-i hayât ve kemâl-i sıhhatinde mülkü iken evvelen kendi nefsine ba‘dehû evlâdına ve ba‘de’l-inkırâz fukarâ-i Haremeyn-i Muhteremeyn’e vakf ve şart etmekle bu cümlenin inkırâzından sonra şart-ı vakf-ı mûmâ-ileyh üzere hadîka-i mezbûrenin fukarâ-i mezbûrîn için îcârı lâzım geldikde mûmâ-ileyh Rıdvan Ağa beher yevm on akçe icâre-i müeccele ve yüz bin akçe icâre-i mu‘accele ve lâzım gelen meremmât-ı külliyye ve cüz’iyyesi ve müceddeden binâsı mu‘accelesine mahsûb olunmak üzere istîcâra tâlib olup ziyâde ile tâlib-i âhara zuhûr etmeyip vech-i meşrûh üzere îcâr vakfa enfa‘ olmağın hâlâ Haremeyn Evkāfı nâzırları olup atebe-i aliyye-i sultânîde Dârüssaâde Ağası olan el-Hâc Mustafa Ağa b. Abdulmuin hazretleri ma‘rifeti <> ve tevliyetim hasebi ile vech-i muharrer üzere yevmî onar akçe hesâbınca beher şehr üç yüz akçe icâre-i müeccele ve meblağ-ı mezbûr yüz bin akçe icâre-i mu‘accele ve lâzım gelen meremmât-ı külliyye ve cüz’iyyesi ve müceddeden binâsı mu‘accelesine mahsûb olmak üzere zikr olunan bahçeyi bi-cümleti’t-tevâbi‘ ve’l-levâhık müşârun-ileyh Rıdvan Ağa’ya îcâr ve teslîm eyledim ol dahi minvâl-i muharrer üzere istîcâr ve kabûl eyledikden sonra icâre-i mu‘accelesi olan meblağ-ı mezbûr yüz bin fıddî Osmânî nakd-i râyic fi’l-vakt akçeyi evkāf-ı mezbûre için yedinden tamâmen alıp kabz eyledim. Ba‘de’l-yevm ta‘yîn olunan üç yüz akçe icâre-i müeccelesini mâh be-mâh cânib-i vakfa edâ eyleye. Hâricden kimesne mâni‘ olmayıp keyfe mâ yeşâ sâir emsâli gibi mutasarrıf olsun dedikde gıbbe’t-tasdîki’ş-şer‘î mâ-vaka‘a sebt olundu. Fî-evâili Muharremi’l-harâm min-şühûri sene sitte ve ışrîn ve elf el-hicriyye. Şühûdü’l-hâl: Fahrü’l-akrân Süleyman Kethüdâ-i müşârun-ileyh, Osman Ağa b. ( ) Ser-bevvâbân-ı mûmâ-ileyh, Mehmed Ağa Tophanevî Ser-bevvâbân-ı mûmâ-ileyh, Süleyman Ağa b. ( ) Ser-kilâr-ı müşârun-ileyh, Hüseyin Ağa b. ( ) Kethüdâ-i bevvâbân-ı müşârun-ileyh, Hasan Çavuş b. ( ) Dergâh-ı âlî, Üveys Çavuş b. ( ) Dergâh-ı âlî, Ali Çavuş b. ( ) Mi‘mârî, Ahmed Efendi b. ( ) Tezkireci, Kadri Çelebi b. ( ) Tezkireci, Yusuf Ağa b. ( ) Mirâhor-ı mûmâ-ileyh, Hacı Hüseyin Bey b. ( ) el-cündî, Keyvan Efendi b. ( ) el-müteferrika, Sinan Ağa b. ( ) el-müteferrika, Hasan Ağa b. ( ) zevvâk-ı sultânî, Bayezid Bey b. ( ) el-cündî, Rıdvan Bey b. ( ) el-cündî, Halil Bey b. ( ) el-cündî ve gayruhüm.