Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 268 Hüküm no: 209 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Çavuş b. Abdülmennan tarafından vakfedilen evin mütevellisi tarafından Mehmed Çavuş b. Yusuf’a kiralandığı Mahmiye-i İstanbul’da Haremeyn-i Şerîfeyn vakfına mütevellî olan Hasan Bey b. Mehmed meclis-i şer‘de işbu bâ‘isü’l-kitâb Mehmed Çavuş b. Yusuf mahzarında bi’t-tevliye takrîr-i kelâm edip mahmiye-i merkūmede Dizdâriye mahallesinde sâkin iken bundan esbak vefât eden Hüsrev Çavuş b. Abdülmennan hâl-i hayâtında iken mahalle-i merkūmede vâki‘ iki tarafı Haremeyn Vakfı ile ve bir tarafı Çadırcı el-Hâc Ahmed Vakfı ile ve bir tarafı tarîk-i âm ile mahdûd fevkānî altı bâb odayı ve bir tahta-pûşu ve bir ahırı ve kenîfi müştemil olan menzilini evvelâ nefsine ba‘dehû evlâdına ve ba‘de’l-inkırâz fukarâ-i Haremeyn’e vakfedip hâlâ merkūm Hüsrev Çavuş vefât edip ve evlâdı dahi münkarız olmağla menzil-i mezbûr bi-cümleti’t-tevâbi‘ fukarâ-i Haremeyn’e âid olmağın îcârı lâzım geldikde tâlibîne arz olunup ragabât-ı nâs münkatı‘a oldukdan sonra müşârun-ileyh Mehmed Çavuş yirmi yedi bin akçe icâre-i mu‘accele ve yevmî üçer akçe icâre-i müeccele ile ve meremmât ve binâsına sarf ettiği meblağ mu‘accelesine mahsûb olmak üzere istîcâra tâlib olup bir akçe ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ olmağın ben dahi menzil-i mezbûru târîh-i kitâbdan yirmi yedi bin akçeye icâre-i mu‘accele ve yevmî üçer akçe müeccele hesâbı üzere müşârun-ileyh Mehmed Çavuş’a tevliyetim hasebi ile îcâr ve teslîm eyledim. Ol dahi ber-vech-i muharrer istîcâr ve kabûl <> ettikden sonra icâre-i mu‘accelesi olan yirmi yedi bin akçeyi yedinden bi’t-tamâm kabz eyledim. Ba‘de’l-yevm ta‘yîn olunan icâre-i müeccelesini cânib-i vakfa edâ edip keyfe mâ yeşâ mutasarrıf olsun dedikde gıbbe’t-tasdîk mâ-hüve’l-vâkı‘ ketb olundu. Fî-evâsıtı Cumâdelâhire sene sitte ve ışrîn ve elf. Şühûdü’l-hâl: Abdülgaffâr Efendi b. ( ) el-imâm, Ellez Bey b. Abd el-cündî, Mustafa Bey b. Abd el-bevvâ[b], Hasan Bey b. Abd, Mehmed Bey b. Abd el-bevvâb, Yusuf Bey b. ( ) es-serrâc, Mahmud Çelebi b. el-bevvâ[b], Hamza Bey b. Abd el-bevvâb, Muharrem Çelebi b. Ramazan, Zülfikār b. Abdullah, Behram b. Abdullah ve gayruhüm.