Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 270 Hüküm no: 212 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nahılbend mahallesinden Ali Ağa b. Abdülmennan tarafından kiracısı olduğu eve yapılan tamir masrafının tespiti Mahmiye-i İstanbul’da Haremeyn-i Şerîfeyn Evkāfı’ndan Nahılbend mahallesinde vâki‘ lede’l-ahâlî ma‘lûmü’l-hudûd menzilin icâre-i mu‘accele ile hâlâ müste’ciri olan bâ‘isü’l-kitâb Ali Ağa b. Abdülmennan meclis-i şer‘de vakf-ı mezbûra bi’l-fi‘il mütevellî olan fahrü’l-akrân Hasan Bey b. Mehmed nâm kimesne mahzarında takrîr-i kelâm edip bundan akdem menzil-i mezbûrun câ be-câ bazı mevâzi‘i harâba müşrif olup meremmâta muhtâc oldukda kendi mâlımla ta‘mîr edip ba‘dehû kıymeti icâre-i mu‘acceleme mahsûb olmak üzere izn-i şer‘ ve ma‘rifet-i mütevellî-i mezbûr ile bir bâb fevkānî oda müceddeden ve bir kilâr ihdâs edip ve câ be-câ bazı mevâzi‘i meremmât etmişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf olunması matlûbumdur dedikde savb-ı şer‘den Mevlânâ Hüseyin Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûra varılıp keşf olundukda ber-vech mevâzi‘-i mezbûre ta‘mîr olunmuş bulunup bu cümleye sarf kerestenin ve neccâriyye ve ırgadiyye ve hammâliyenin cem‘an ba‘de külli’l-hesâb sekiz bin iki yüz akçeye tahammülü vardır deyu mimâr-ı mezbûr ve sâir ehl-i vukūf ittifâk ettiklerini mevlânâ-yı mezbûr mahallinde tahrîr edip ba‘dehû meclis-i şer‘a gelip inhâ etmeğin mâ-hüve’l-vâkı‘ ketb olundu. Fî-evâsıtı Zilka‘deti’ş-şerîfe min-şühûri sene sitte ve ışrîn ve elf. Şühûdü’l-hâl: Mehmed Efendi b. Ali el-imâm, Ömer Ağa b. ( ), Mustafa b. Veli, Hüseyin Çelebi b. Ömer, Mehmed Çelebi b. Hüseyin, Ferhad Bey b. Abdi ve gayruhüm.