Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 271 Hüküm no: 213 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun bt. Abdullah’ın Horhor mahallesindeki evinin vakfiyesi Mâ-tazammenehu hâzihi’s-sahîfeti’s-sahîha min-asli’l-vakfi ve şerâyitihi ve kuyûdihi ve zavabitihi vaka‘a ledeyye ve’ttehaze beyne yedeyye ve hakemtü bi-sıhhatihî ve lüzûmihî fi husûsihî ve umûmihî âlimen bi-mevâzi‘i’l-hilafi câri beyne’l-eimmeti’l-eşrâf ve ene efkarül-verâ Mehmed b. Muharrem el-müvellâ hilâfeten bi-mahkemeti Ahî Çelebi bi-Dâri’s-saltanati’l-aliyye. Dârü’s-saltanati’s-seniyye mahallâtından Horhor mahallesi sâkinelerinden sâhibetü’l-hayrât Hadice Hatun bt Abdullah tarafından husûs-ı âti’z-zikri ikrâra ve da‘vâ-yı rücû‘a vekîl olup garîm-i câhidü’l-vekâle mahzarında Hasan Şücâ‘ b. Receb ve diğer Hasan b. Abdurrahman şehâdetleri ile isbât-ı vekâlet eden Halil Bey b. Mustafa el-cündî meclis-i şer‘de vakf-ı câ’i’l-beyâna li-ecli’t-tescîl mütevellî nasb olunan Ya‘kub Halîfe b. Sinan muvâcehesinde bi’l-vekâle ikrâr edip müvekkilem müşârun-ileyhâ Hadice Hatun mahalle-i merkūmede vâki‘ iki fevkānî beyti ve bir su kuyusunu ve bir kenîfi müştemil ve hudûdunun bir tarafı benim mülküme ve bir tarafı Hamza Bey b. Abdullah mülküne ve bir tarafı Karamanî Kâtib Mehmed Çelebi mülküne ve bir tarafı tarîk-i âmma müntehî olup silk-i mülk-i sahîhinde muntazam olan menzili bi-cümleti’l-hudûd vakf-ı sahîh edip şöyle şart eyledi ki mâdâm ki hayâtda olam süknâsı kendimiçin ola ba‘de vefâtihâ menzil-i mezbûrun kapı tarafında olan beytin süknâsı hâlâ zevci Mustafa b. Abdullah mutasarrıf ola ba‘de vefâtihî mahmiye-i merkūmeden Medîne-i Münevvere mütevellîsi yediyle îcâr olunup hâsıl olan ücreti Medîne-i mezbûre fukarâsına irsâl oluna ve beyt-i âharın süknâsı vâkıfe-i mezbûrenin mu‘takası Halime bt. ( ) ba‘de vefâtihâ evlâdı ve evlâdı evlâdı mutasarrıf olalar ba‘de inkırâzihim ol dahi vech-i meşrûh üzere îcâr olunup hâsıl olan ücreti Medîne fukarâsına irsâl oluna deyu menzil-i merkūmu mezkûr Ya‘kub Çelebi’ye teslîm eyleyip ol dahi tesellüm eyledi deyip tarafından ilh. Hurrire fî-evâhiri Cumâdelâhire li-sene hamse ışrîn ve elf. Şühûdü’l-hâl: Ya‘kub Çelebi b. Sinan el-imâm, Mehmed b. Sinan el-müezzin, Mustafa b. ( ), Ramazan b. ( ), Hasan b. ( ), Hacı Asgar b. ( ), Nasuh b. Pîrî, Murad b. ( ), Receb b. Ferhad, Mehmed b. Ramazan, Hasan b. ( ), Mustafa b. ( ), Ahmed Çelebi b. Resul ve gayruhüm.