Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 272 Hüküm no: 214 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukur mahalleden Hatice Hatun’un vakfettiği evin Haremeyn Vakfı mütevellisi tarafından Mustafa b. Mehmed’e kiralandığı Mütevellî-i merkūm meclis-i şer‘de sâhibü’l-kitâb Mustafa b. Mehmed nâm kimesne mahzarında bi’t-tevliye ikrâr ve takrîr-i kelâm edip mahmiye-i merkūmede Çukur mahallesinde sâkine iken bundan esbak vefât eden Hadice Hatun bt. Abdullah hâl-i hayâtında iken mahalle-i merkūmede vâki‘ bir tarafı vakf-ı mezbûr ve bir tarafı Hamza Bey b. ( ), ve bir <> tarafı Mehmed Çelebi b. ( ) mülkü ve bir tarafı tarîk-i âm ile mahdûd iki bâb fevkānî odayı ve bi’r-i mâyı ve kenîfi müştemil mülk menzilini evvelâ nefsine ba‘de nısfı utekāsına ve nısf-ı âharı zevci Mustafa b. Abdullah’a ba‘dehû fukarâ-i Haremeyn’e vakfedip hâlâ merkūm Mustafa vefât edip menzil-i mezbûrun nısfı Haremeyn’e âid olmağın îcârı lâzım geldikde tâlibîne arz olunup ragabât-ı nâs münkatı‘a oldukdan sonra mezbûr Mustafa üç bin akçe icâre-i mu‘accele ve bir akçe [icâre-i] müeccele ve meremmâtına sarf eylediği meblağ mu‘accelesine mahsûben istîcâra tâlib olup bir akçe ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ olmağın ben dahi menzil-i mezbûrun nısfını târîh-i kitâbdan üç bin akçe mu‘accele ve yevmî birer akçe müeccele hesâbı üzere tevliyetim hasebi ile îcâr eyledim <> ol dahi kabûl ettikden sonra mu‘accelesi olan meblağ-ı mezbûru yedinden bi’t-tamâm alıp kabz eyledim dedikde gıbbe’t-tasdîk mâ-hüve’l-vâkı‘ ketb olundu. Fî-evâili Muharremi’l-harâm min-şühûri sene seb‘a ve ışrîn ve elf. Şühûdü’l-hâl: Mehmed Efendi b. İbrahim el-imâm, Mehmed Halîfe b. Süleyman el-müezzin, Ahmed Beşe b. ( ), Halil Bey b. Mustafa, Murad Bey b. ( ) el-bevvâb, el-Hâc Mehmed ve gayruhüm.